Qurolli Kuchlar akademiyasi dala-o‘quv maydonida yangilangan o‘quv bazasi foydalanishga topshirildi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Tantanali tadbirda ishtirok etgan O‘zbekiston mudofaa vaziri general-mayor Bahodir Qurbonov yangilangan o‘quv bazani foydalanishga topshirilishi Qurolli Kuchlar akademiyasi tarixida yangi sahifa ochishini, harbiy ta’lim jarayonini yanada yuqori pog‘onaga olib chiqishini ta’kidlab o‘tdi.
“Yangilangan bazada qurilish ishlari olti oy davomida olib borildi. Dala sharoitida shaharchada kursantlar uchun barcha qulaylik yaratilgan. Qurilish ishlarida mahalliy ishlab chiqaruvchilarning qurilish mollaridan foydalanildi. Sifat darajasi chet elnikidan aslo farq qilmaydi”, — deydi “Fartib garant montaj” MChJ rahbari Sherzod To‘rayev.
Zamon talablari asosida qaytadan qurilgan yotoqxona, tibbiyot punkti, oshxona, o‘quv xonalari va boshqa binolar har tomonlama qulaylikka ega. O‘quv jarayoniga bevosita ijobiy ta’sir ko‘rsatishga xizmat qiladigan yangiliklardan biri — har bir o‘quv binosi interaktiv doskalar bilan jihozlanganligi. Ushbu zamonaviy doska kursantlarni O‘zbekiston armiyasi va chet el armiyalarida mavjud bo‘lgan otish qurollarini ishlash prinsipi va mexanizmlarini o‘rgatishda o‘qituvchi-professorlarga katta qulaylik yaratadi.
Mudofaa vazirining o‘rinbosari general-mayor Azizbek Ikromov mehmonlarni yangilangan o‘quv bazasi bilan tanishtirar ekan, Qurolli Kuchlar akademiyasi tinglovchilari va kursantlari bunday e’tibordan yanada ruhlanib, o‘z mutaxassisliklarining yetuk egalari bo‘lib yetishishlarini alohida ta’kidlab o‘tdi.
Izoh (0)