Қуролли Кучлар академияси дала-ўқув майдонида янгиланган ўқув базаси фойдаланишга топширилди. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.
Тантанали тадбирда иштирок этган Ўзбекистон мудофаа вазири генерал майор Баҳодир Қурбонов янгиланган ўқув базани фойдаланишга топширилиши Қуролли Кучлар академияси тарихида янги саҳифа очишини, ҳарбий таълим жараёнини янада юқори поғонага олиб чиқишини таъкидлаб ўтди.
«Янгиланган базада қурилиш ишлари олти ой давомида олиб борилди. Дала шароитида шаҳарчада курсантлар учун барча қулайлик яратилган. Қурилиш ишларида маҳаллий ишлаб чиқарувчиларнинг қурилиш молларидан фойдаланилди. Сифат даражаси чет элникидан асло фарқ қилмайди», — дейди «Фартиб гарант монтаж» МЧЖ раҳбари Шерзод Тўраев.
Замон талаблари асосида қайтадан қурилган ётоқхона, тиббиёт пункти, ошхона, ўқув хоналари ва бошқа бинолар ҳар томонлама қулайликка эга. Ўқув жараёнига бевосита ижобий таъсир кўрсатишга хизмат қиладиган янгиликлардан бири — ҳар бир ўқув биноси интерактив доскалар билан жиҳозланганлиги. Ушбу замонавий доска курсантларни Ўзбекистон армияси ва чет эл армияларида мавжуд бўлган отиш қуролларини ишлаш принципи ва механизмларини ўргатишда ўқитувчи-профессорларга катта қулайлик яратади.
Мудофаа вазирининг ўринбосари генерал майор Азизбек Икромов меҳмонларни янгиланган ўқув базаси билан таништирар экан, Қуролли Кучлар академияси тингловчилари ва курсантлари бундай эътибордан янада руҳланиб, ўз мутахассисликларининг етук эгалари бўлиб етишишларини алоҳида таъкидлаб ўтди.
Изоҳ (0)