Jinoyat ishlari bo‘yicha Konimex tumani sudida “Odnoklassniki” orqali diniy aqidaparastlikni targ‘ib qilgan erkakka nisbatan sud hukmi o‘qildi, deb xabar beradi “Aniq.uz”.
E.B. 2012-yilda “Odnoklassniki.ru” ijtimoiy tarmog‘ida “E.B.” profilini ro‘yxatdan o‘tkazgan bo‘lib, mazkur profil orqali virtual do‘stlari bilan suhbatlashib, Abdulloh Buxoriyning “Demokratiya bu kufr” nomli aqidaparastlik g‘oyalari bilan yo‘g‘rilgan videofaylni tarqatgan.
“Shuningdek, u Obid Nazarovga tegishli an’anaviy islomga zid fikrlarni tarqalishida, dindorlar o‘rtasida islom asoslariga nisbatan turli ixtiloflarni yuzaga keltirib chiqaruvchi ‘qiyomat alomatlari’ nomli diniy ma’ruzasini hamda ‘Mard yigitlar nashida, klass bosilar Musulmonlar ko‘rsin’ nashida-qo‘shiq fuqarolarda turli ekstremistik tashkilotlar faoliyatiga nisbatan xayrixohlik uyg‘otishi mumkinligi, ushbu diniy-ekstremistik materiallarni O‘zbekiston Respublikasi hududida tayyorlash, tarqatish va xorijdan olib kirish taqiqlangan diniy-ekstremistik videofayllarga ‘klass’ belgisini bosish orqali virtual do‘stlariga tarqatib kelgan”, — deyiladi xabarda.
E.B. 2019-yil mart oyida mazkur profilida ishlashi davomida “Obidxon qori qiyomat alomatlari”, “Mard yigitlar nashida klass bosilar, Musulmonlar ko‘rsin”, “Abdulloh Buxoriy demokratiya bu kufr” nomli diniy mazmundagi videofayllarni eshitib, profildan faqat o‘zi foydalangan.
E.B. O‘zbekiston Respublikasi Jinoyat kodeksi 244-moddasi (Jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismining “g” bandida nazarda tutilgan jinoyatni sodir etganlikda aybli deb topildi.
Jinoyat ishlari bo‘yicha Konimex tumani sudi raisi F.Qahhorov tomonidan E.B.ga nisbatan jinoyat ishi ko‘rilib, O‘zbekiston Respublikasi Jinoyat kodeksi 244-moddasi 3-qismining “g” bandi bilan Jinoyat kodeksining 57-moddasini qo‘llab, 3 yil muddatga ozodlikni cheklash jazosi tayinlandi.
Izoh (0)