Yakkabog‘da yoqib yuborilgan “snos”lar bo‘yicha hokim o‘rinbosari va uni yoqmoqchi bo‘lgan tadbirkor ustidan sud boshlandi

Jinoyat ishlari bo‘yicha Chiroqchi tuman sudida 17-sentabr kuni Yakkabog‘ tuman hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari vazifasida ishlagan Mansur Tuymayev va binosi “snos”ga tushgan tadbirkor Bahriddin Isamovga nisbatan ochiq sud boshlandi. Bu haqda Oliy sud matbuot xizmati “Daryo”ga ma’lum qildi.

Tadbirkor Bahridin Isamov Jinoyat kodeksining 25, 98-moddasi (kuchli ruhiy hayajonlanish holatida qasddan odam o‘ldirishga suiqasd qilish)da nazarda tutilgan jinoyatni sodir etganlikda ayblanmoqda.

Shuningdek, Mansur Tuymayev Jinoyat kodeksining 192-1-moddasi (xususiy mulk huquqini buzish) 3-qismi “a” bandi va 206-moddasi (hokimiyat yoki mansab vakolati doirasidan chetga chiqish) 2-qismi “a” bandida nazarda tutilgan jinoyatlarni sodir etganlikda ayblanmoqda.

Qo‘shimcha qilinishicha, sud jarayoni davomida 15 dan ortiq jabrlanuvchi va 60 dan ziyod guvoh so‘roq qilinadi.

Avvalroq, qashqadaryolik tadbirkor Bahridin Isamovning do‘konini buzmoqchi bo‘lgan hokimning “snos”lar bo‘yicha o‘rinbosari Mansur Tuymayev yoqib yuborgani haqda xabar berilgandi. Bunga Mansur Tuymayevning 30 ga yaqin do‘konni buzib, kompensatsiya to‘lamagani sabab bo‘lgani aytilgandi. Voqeadan ko‘p o‘tmay Bahriddin Isamov qamoqqa olingandi. 29-avgust kuni tadbirkor qamoqdan ozod qilingani ma’lum bo‘lgandi.