Жиноят ишлари бўйича Конимех тумани судида «Одноклассники» орқали диний ақидапарастликни тарғиб қилган эркакка нисбатан суд ҳукми ўқилди, деб хабар беради «Aniq.uz».
Э.Б. 2012 йилда «Odnoklassniki.ru» ижтимоий тармоғида «Э.Б.» профилини рўйхатдан ўтказган бўлиб, мазкур профил орқали виртуал дўстлари билан суҳбатлашиб, Абдуллоҳ Бухорийнинг «Демократия бу куфр» номли ақидапарастлик ғоялари билан йўғрилган видеофайлни тарқатган.
«Шунингдек, у Обид Назаровга тегишли анъанавий исломга зид фикрларни тарқалишида, диндорлар ўртасида ислом асосларига нисбатан турли ихтилофларни юзага келтириб чиқарувчи ‘қиёмат аломатлари’ номли диний маърузасини ҳамда ‘Мард йигитлар нашида, класс босилар Мусулмонлар кўрсин’ нашида-қўшиқ фуқароларда турли экстремистик ташкилотлар фаолиятига нисбатан хайрихоҳлик уйғотиши мумкинлиги, ушбу диний-экстремистик материалларни Ўзбекистон Республикаси ҳудудида тайёрлаш, тарқатиш ва хориждан олиб кириш тақиқланган диний-экстремистик видеофайлларга ‘класс’ белгисини босиш орқали виртуал дўстларига тарқатиб келган», — дейилади хабарда.
Э.Б. 2019 йил март ойида мазкур профилида ишлаши давомида «Обидхон қори қиёмат аломатлари», «Мард йигитлар нашида класс босилар, Мусулмонлар кўрсин», «Абдуллоҳ Бухорий демократия бу куфр» номли диний мазмундаги видеофайлларни эшитиб, профилдан фақат ўзи фойдаланган.
Э.Б. Ўзбекистон Республикаси Жиноят кодекси 244-моддаси (Жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисмининг «г» бандида назарда тутилган жиноятни содир этганликда айбли деб топилди.
Жиноят ишлари бўйича Конимех тумани суди раиси Ф.Қаҳҳоров томонидан Э.Б.га нисбатан жиноят иши кўрилиб, Ўзбекистон Республикаси Жиноят кодекси 244-моддаси 3-қисмининг «г» банди билан Жиноят кодексининг 57-моддасини қўллаб, 3 йил муддатга озодликни чеклаш жазоси тайинланди.
Изоҳ (0)