Тошкент шаҳар ИИББ ЙҲХБ ходимлари томонидан олиб борилаётган профилактик ишлар аста-секинлик билан натижа бермоқда, деб хабар беради пойтахт ИИББ матбуот хизмати.
«Мисол учун, жорий йилнинг ёз фаслида олиб борилган ишлар давомида пойтахтда тротуарларда ҳаракатланиш ёки тўхташ ва тўхтаб туриш қоидаларини бузиш каби пиёдалар ҳуқуқларини менсимаслик ҳолатлари сезиларли даражада камайди. Аммо йўл ҳаракати қоидалари бузилиши профилактикаси йўналишидаги ишлар ҳали кўп», — дейилади хабарда.
2019 йилнинг 9 сентябрь кунидан 15 сентябргача бўлган давр ичида ИИББ ЙҲХБ ЙПХ инспекторлари томонидан Йўл ҳаракати қоидалари бузилганлиги билан боғлиқ 14 807 та фактни қайд этди, шулардан 1 883 таси — қўпол тарздаги қоидабузарликлардир.
«Ўтган ҳафта давомида йўл белгиларини менсимаслик билан боғлиқ 2 411 та ҳолат ва йўл чизмаларини менсимаслик билан боғлиқ 1 573 та ҳолат қайд этилди. Бу эса ўз навбатида йўл ҳаракатининг бошқа иштирокчилари ҳуқуқларини ҳурмат қилмасликнинг ва тўқнашувлар эҳтимолини оширишнинг тўғридан тўғри далилидир.
Ҳурматли ҳайдовчи ва пиёдалар! Йўллардаги хулқ-атворимиз бизнинг камчилигимиз эмас, балки фахримизга айланиши зарур. Қоидаларга риоя қилиш соғлиқ ва ҳаётни асрашга сабаб бўлади. Йўл ҳаракати қоидалари — бу фақатгина светофорнинг тақиқловчи сигнали ҳақидаги маълумот эмас, ўзингиз амин бўлинг», — дейилади хабарда.
Изоҳ (0)