Buxoro davlat universitetida tashkil etilgan yangi Agronomiya va biotexnologiya fakultetining yangi binoga ko‘chirilishi ko‘plab talabalarning noroziligi va e’tiroziga sabab bo‘ldi.
Yangi o‘quv yili boshidanoq u yerda zarur shart-sharoitlarning yo‘qligi haqidagi e’tirozlar ijtimoiy tarmoqlar foydalanuvchilarining diqqatini jalb etdi. Ismi-sharifi ochiqlanishini istamagan bir guruh talabalar “Daryo”ga murojaatida yangi o‘quv binosida sharoitlar mavjud emasligi, jumladan, oshxona, hojatxona, sport zali yo‘qligi, laboratoriya xonasi jihozlanmagani, ustiga-ustak, qatnov uchun masofa uzoqligini bildirgan.
Ma’lumotga ko‘ra, Oliy va o‘rta maxsus ta’lim vazirining 2019-yil 10-iyundagi 513-sonli buyrug‘i bilan (Vazirlar Mahkamasining 29 maydagi 14/1-1074-sonli topshirig‘i ijrosini ta’minlash maqsadida) Buxoro davlat universitetida “Biologiya” va “Tuproqshunoslik” yo‘nalishlari negizida Agronomiya va biotexnologiya qo‘shma dasturlar fakulteti tashkil etilgan.
Buxoro viloyati hokimligi ko‘rsatmasi hamda vazirlikning 2019-yil 29-avgustdagi 773-sonli buyrug‘i bilan Buxoro tumanidagi “Rabotiqalmoq” qishlog‘i, Yangiobod ko‘chasida joylashgan Sanoat kasb-hunar kolleji binosi universitet tasarrufiga o‘tkazilgan. Mazkur fakultetda istiqbolda agronomiya, biotexnologiya, agrokimyo va agrotuproqshunoslik, qishloq xo‘jaligi mahsulotlarini saqlash va dastlabki ishlash texnologiyasi, agrologistika, agrobiznes, o‘simliklar himoyasi va karantini ta’lim yo‘nalishlari bo‘yicha xorijiy oliy ta’lim muassasalari bilan hamkorlikda qo‘shma ta’lim dasturlari asosida kadrlar tayyorlanadi.
Ushbu yangi fakultetda “Biologiya” (turlari bo‘yicha) va “Tuproqshunoslik” ta’lim yo‘nalishlari bo‘yicha o‘qiyotgan talabalar o‘z yo‘nalishlari bo‘yicha o‘qishni davom ettirib, belgilangan namunadagi bakalavrlik diplomiga ega bo‘ladi.
Bildirilishicha, Buxoro davlat universiteti talabalari kontingenti joriy o‘quv yilida salkam 14 mingga yetgan. Kelgusi yilda muassasa talabalari soni 20 ming nafarni, 2030-yillarga borib esa 40 ming nafarni tashkil etishi kutilyapti. Universitet esa bor-yo‘g‘i 6 mingdan ortiqroq talabaga moslashtirilgan va yaqin yillargacha ko‘pi bilan 7-8 ming talaba 2 smenada o‘qitib kelingan.
— Dunyo amaliyotida ham universitetlar odatda bir joyda joylashmaganligini ko‘rishimiz mumkin. Jahonning ko‘pgina mashhur universitetlari kampuslar ko‘rinishida shahar tashqarisida joylashganligi odatiy hol. Talabalar tomonidan qo‘yilayotgan talablar esa universitet imkoniyatiga to‘g‘ri kelmaydi. Ta’lim jarayonlari 2 smenada olib borilayotganiga qaramay, o‘z-o‘zidan joy masalasi tanqis. Ayni kunda universitetimizda ta’lim jarayonlari 7 ta manzilda olib borilmoqda. Jumladan, joriy o‘quv yilida shahar va uning atrofida joylashgan, ilgari kasb-hunar kollejlari binolari va boshqa maqsadlarda ishlatilgan 3 ta o‘quv binosi universitet tasarrufiga o‘tkazildi. Hozirda ularda o‘qish va ta’lim uchun barcha sharoitlar bor. — deydi universitet rektori, professor Obidjon Hamidov. — Hozirda Agronomiya va biotexnologiya fakulteti joylashgan ilgarigi Buxoro tuman Sanoat kasb-hunar kollejiga qatnovni yaxshilash uchun viloyat hokimligi hamda viloyat yo‘l-transport departamenti bilan kelishilgan holda 2 ta yo‘nalishli avtobuslar xizmati yo‘lga qo‘yildi. U yerda universitetning boshqa binolaridan kam bo‘lmagan imkoniyat va sharoitlarni yaratish uchun barcha imkoniyatlarni ishga solyapmiz.
Agronomiya va biotexnologiya fakulteti uchun uning ta’lim yo‘nalishi qishloq xo‘jaligi sohasiga muvofiqlashtirilgani sababli viloyatning qishloq xo‘jaligi tarmog‘i eng yaxshi rivojlangan hudud — universitet bosh binosidan 10,5 kilometr, shahar halqa yo‘lidan 3 kilometr masofada joylashgan ta’lim muassasasi tanlangan.
— Shahar markazidan o‘qishga qatnashimiz uchun avtobuslar yetishmaydi. Ba’zida hatto ikkita transport almashtirishimizga to‘g‘ri kelyapti. 10,5 kilometr narida tahsil olib, yana shuncha kilometr yo‘l bosib, yotoqxonaga qaytish ham pul bilan, ham vaqt bilan bog‘liq muammolarni keltirib chiqaryapti. Bosh korpusda turli xorij tillari to‘garaklariga qatnardik. Afsuski, masofa oralig‘i bizning qo‘shimcha saboqlarimiz vaqtini o‘tkazib yuborishimizga sabab bo‘lyapti. Bir kunda 20-25 ming so‘m sarflashimizga to‘g‘ri kelyapti. Bundan tashqari, oshxona kichik, buyam yetmaganday, ovqatlar sifati ham talabga javob bermaydi, — deydi talabalar.
“Daryo” muxbiri tomonidan holat o‘rganilar ekan, yangi o‘quv binosida moddiy-texnik baza mustahkamlangani, mavjud oshxona yonida qo‘shimcha ravishda yengil konstrutsiyali 70 o‘ringa mo‘ljallangan oshxona tiklangani, kutubxona va bufet xizmati borligi va ayni paytda yopiq qishki oshxona tiklash ishlari bajarilayotganiga oydinlik kiritildi.
“Buxoro tumanidagi sanoat kasb-hunar kolleji binosi o‘quv jarayonlarini olib borishda hech qanday talabga javob bermaydi. Ma’ruzalarni faollar zali yoki kollej sport maydonchasida tikka turgan holda o‘tkazamiz. O‘quv xonasining shundoq yonida oshxona, ovqat hidi o‘quv xonalari havosini buzib turadi. Laboratoriya mashg‘ulotlarini o‘tkazish uchun ham anjomlar yo‘q. Muammolarni yechsangiz, 500 nafardan ortiq talabaning og‘irini yengil qilgan bo‘lardingiz”, — deyiladi murojaatda.
Yangi bino internet tarmog‘iga ulangan, o‘quv auditoriyalari va boshqa xonalarni o‘zaro ichki lokal kompyuter tarmog‘iga birlashtirish ishlari davom ettirilmoqda, tibbiyot punkti va sport zalini jihozlash bo‘yicha amaliy ishlar boshlangan. Biroq, sport maydonchasi ta’mirtalab: inventarlar yo‘q, mavjudlari ham foydalanishga yaroqsiz.
— Albatta, kamchiliklar yo‘q emas, bor. Ammo yangi joy, yangi maskan. O‘n kun ichida shuncha natijaga erishdik. Uzog‘i bilan yana bir hafta yoki o‘n kun ichida qishloq ichidagi ushbu ta’lim muassasasi ham shahar markazidagi bilimgohdan qolishmaydigan imkoniyatlarga ega bo‘ladi. Ko‘rib turganingizdek, o‘quv binosi shinam va zamonaviy. Ushbu binoga ko‘chib kelganimizda uni alohida remont qilishga hojat yo‘q edi. Agronomiya va biotexnologiya fakultetida ta’lim jarayonlari bevosita ko‘proq amaliyotga qaratilgani bois, yangi o‘quv yilining to‘rtinchi kuniyoq ilgarigi o‘quv binolaridan biologiya va kimyo o‘quv laboratoriyalari ko‘chirib kelindi. Ushbu laboratoriyalarda xorijiy fondlar hisobidan qiymati 300 ming yevroga teng zamonaviy jihozlar mavjud. Ammo talabalarga dastlab 15 kun-bir oy davomida nazariy bilimlar berilishi, keyin esa laboratoriya mashg‘ulotlarini o‘tkazish ko‘zda tutilgani uchun ular laboratoriya xonalari va jihozlari yo‘q, deb o‘ylashgan bo‘lishi mumkin, — dedi fakultet dekani Abbos Qodirov.
Shu kuni yangi tashkil etilgan fakultet faollar zalida universitet rektori hamda talaba-yoshlar uchrashuvi o‘tkazildi. Unda Buxoro shahar markaziga yaqin — 10,5 kilometr masofaga ko‘chirilgan manzilga qatnovchi yo‘nalishli avtobuslar sonini oshirish, o‘quv binosi oldidan kesib o‘tuvchi yo‘l ikki yonida zamonaviy ko‘rinishga ega bekatlar barpo etish, shuningdek, talabalarning taklif va talablariga ko‘ra, bir necha kun ichida xorij tillari to‘garaklarini ochish ishlari amalga oshirilishi ma’lum qilindi.
Izoh (0)