Қўқон шаҳридаги Буюк алломалар музейида Президент Шавкат Мирзиёевнинг Фарғона вилояти фаоллари, нуронийлар, зиёлилар билан мулоқоти бўлиб ўтди. Президент матбуот хизматининг хабар беришича, учрашувда маданият, маърифат соҳаларидаги ўзгаришлар, ёшлар таълим-тарбияси ҳақида сўз борган.
«Вақт шиддат билан ўтяпти. Ҳар бир соҳа бўйича изланишда, тинимсиз ҳаракатдамиз. Ўзгаришлар бор, лекин ҳали бизни қаноатлантирмайди», — деб таъкидлаган Президент Шавкат Мирзиёев Фарғона зиёлилари билан учрашувда.
Давлат раҳбарининг матбуот хизмати қайд этишича, «фаоллар бутун Фарғона вилоятида бўлгани каби Қўқон шаҳрида ҳам улкан бунёдкорлик ишлари амалга оширилаётгани, Халқаро ҳунармандчилик фестивали туфайли шаҳар янада обод бўлиб, бу ерга бутун дунёдан меҳмонлар келганини мамнуният билан қайд этган».
Хабар беришларича, Буюк алломалар музейи Президент ташаббуси билан ташкил этилган. Бу ерга келувчилар Қўқонда яшаб, ижод қилган адиб ва алломалар ҳаёти, асарлари ҳақида маълумот олади. Буюмлар, турли идишлар эса ўша давр турмуш тарзидан дарак беради.
Изоҳ (0)