Tojikiston prezidenti Emomali Rahmonning kuyovi Shamsullo Sohibovga tegishli bo‘lgan mamlakatdagi yirik kompaniyalardan biri “Faroz” yopiq aksiyadorlik jamiyati (YoAJ) Soliq qo‘mitasiga kompaniyani ixtiyoriy tugatish haqida ma’lum qildi. Bu haqda “Aziya-Plyus” xabar berdi.
“Aslida mamlakat Soliq qo‘mitasiga YoAJni uning tarkibiga kiruvchi barcha kompaniyalar bilan birga ixtiyoriy tugatish haqida ariza yozdik. Bu masala yuzasidan batafsil ma’lumotni keyingi hafta e’lon qilamiz”, — deyilgan kompaniya bergan xabarda.
Avvalroq internet tarmoqlarida kompaniyaning Tojikiston Soliq qo‘mitasiga yo‘llagan xati nusxasi paydo bo‘lgan bo‘lib, unda “Jamiyat respublikaga yoqilg‘i-moylash materiallarini yetkazib berishda mamlakat bozorida raqobatbardoshligini yo‘qotganligi” aytilgan. Bunga xomashyo narxining yuqoriligi sabab qilib ko‘rsatilgan.
Xatda, shuningdek, kompaniyaning moliyaviy samaradorligiga jahon iqtisodiy inqirozi va uning salbiy oqibatlari ta’sir ko‘rsatganligi ta’kidlangan. Shu sababli, “kompaniya aksiyadorlari yig‘ilishi barcha mulkni sotish to‘g‘risida qaror qabul qilgan”.
Shu bilan birga, 9-sentabr, dushanba kun “Faroz” So‘g‘d viloyatida 3 ta xalqaro avtomobil terminali qurmoqchi ekanligi, buning uchun kompaniyaga hozirda dehqon xo‘jaligiga tegishli bo‘lgan yer uchastkalari ajratilganligi ma’lum bo‘lgan.
“Faroz” YoAJ — ko‘p tarmoqli kompaniya bo‘lib, iqtisodiyotning xizmat ko‘rsatish sohasidan tortib og‘ir sanoatgacha bo‘lgan yo‘nalishlarida faoliyat olib boradi. Yonilg‘i savdosi, kovrak giyohini terib olish va ishlab chiqarish kabi sohalarda monopolist hisoblanadi.
Kompaniyaga 2008-yili Dushanbeda asos solingan. Tojikistonning barcha yirik shaharlari va tumanlarida, shuningdek, xorijda ham vakolatxona va filiallarga ega.
Izoh (0)