Эмомали Раҳмоннинг куёвига тегишли монополист компания мулкини сотиш ва фаолиятини тугатиш ҳақида эълон қилди

Тожикистон президенти Эмомали Раҳмоннинг куёви Шамсулло Соҳибовга тегишли бўлган мамлакатдаги йирик компаниялардан бири «Фароз» ёпиқ акциядорлик жамияти (ЁАЖ) Солиқ қўмитасига компанияни ихтиёрий тугатиш ҳақида маълум қилди. Бу ҳақда «Азия-Плюс» хабар берди.

«Аслида мамлакат Солиқ қўмитасига ЁАЖни унинг таркибига кирувчи барча компаниялар билан бирга ихтиёрий тугатиш ҳақида ариза ёздик. Бу масала юзасидан батафсил маълумотни кейинги ҳафта эълон қиламиз», — дейилган компания берган хабарда.

Аввалроқ интернет тармоқларида компаниянинг Тожикистон Солиқ қўмитасига йўллаган хати нусхаси пайдо бўлган бўлиб, унда «Жамият республикага ёқилғи-мойлаш материалларини етказиб беришда мамлакат бозорида рақобатбардошлигини йўқотганлиги» айтилган. Бунга хом ашё нархининг юқорилиги сабаб қилиб кўрсатилган.

Хатда, шунингдек, компаниянинг молиявий самарадорлигига жаҳон иқтисодий инқирози ва унинг салбий оқибатлари таъсир кўрсатганлиги таъкидланган. Шу сабабли, «компания акциядорлари йиғилиши барча мулкни сотиш тўғрисида қарор қабул қилган».

Шу билан бирга, 9 сентябрь, душанба кун «Фароз» Сўғд вилоятида 3 та халқаро автомобиль терминали қурмоқчи эканлиги, бунинг учун компанияга ҳозирда деҳқон хўжалигига тегишли бўлган ер участкалари ажратилганлиги маълум бўлган.

«Фароз» ЁАЖ — кўп тармоқли компания бўлиб, иқтисодиётнинг хизмат кўрсатиш соҳасидан тортиб оғир саноатгача бўлган йўналишларида фаолият олиб боради. Ёнилғи савдоси, коврак гиёҳини териб олиш ва ишлаб чиқариш каби соҳаларда монополист ҳисобланади.

Компанияга 2008 йили Душанбеда асос солинган. Тожикистоннинг барча йирик шаҳарлари ва туманларида, шунингдек, хорижда ҳам ваколатхона ва филиалларга эга.