Turkmanistonning Toshhovuz viloyatida ishlab chiqarilayotgan nonni yeb bo‘lmay qoldi, deb yozadi Turkmen.news.
Bulka noni nafaqat be’maza, balki salomatlik uchun zararli ham bo‘lib qoldi.
“Bu qoramol uchun mo‘ljallangan yem-xashak donidan tayyorlangan qatron uniga juda o‘xshaydi. Nonning tashqi ko‘rinishi va sifati bo‘yicha standart talablarga javob bermasligini tushunish uchun mutaxassis bo‘lish shart emas”, — deyiladi xabarda.
Do‘kon rastalarida sifatsiz non joriy yilda viloyat un ishlab chiqaruvchi korxonalari dondan un ishlab chiqara boshlaganidan keyin paydo bo‘ldi.
Nonning tashqi ko‘rinishi, hidi, ta’mi — ishonchsizlik uyg‘otadi. Bundan tashqari, non ertasi kuni g‘ishtdek qotib qolmoqda.
Yumshoq qilib aytganda, bunday nonni yeyish juda xavfli. Insonning oshqozonida muammolar paydo bo‘lganida u kasallik non tufayli kelib chiqqanini anglamaydi. Biroq odamlar uni sotib olmoqda. Chunki bunday nonlar juda arzon. Yaxshi sifatli non bozorda qimmat turadi, bu non esa 0,60 manat.
Mutaxassislardan biri nonning sifati yomonlashishiga don sifati yomonlashgani sabab bo‘lganini taxmin qildi. Bunday don ko‘proq qoramol va parrandalarga to‘g‘ri keladi, undan non pishirish maqsadga muvofiq emas.
Biroq, bunday sifatsiz don pishmasdan, muddatidan oldin o‘rib olinmoqda. Bu harakat esa rejani bajarish uchun qilinmoqda.
Qayd etilishicha, viloyatda tuxum narxi ham oshgan. Parrandachilik bilan shug‘ullanayotgan xususiy tadbirkorlar qiyin vaziyatda qolgan.
Parrandalar ozuqasi va don kundan kunga qimmatlashmoqda.
Parrandalar uchun mo‘ljallangan oziqaning ikki qopi 200 manat (11 dollar atrofida) turadi. Bunday oziqani bir hafta avval 50 manatga sotib olsa bo‘lardi, bugun esa 60 manat so‘rashmoqda.
Oziqa qimmatlashishi ortidan tuxumning ham narxi oshmoqda.
“Do‘konda oq tuxum 1 manat turadi, lekin aholi oqdan ko‘ra jigarrang tuxumni afzal ko‘radi, bunday tuxumning bahosi esa bozorda 2 manat. Oq tuxum tovuqchilik fermalarida, jigarranggi esa uy tovuqlaridan olingan”, — deydi do‘kon sotuvchisi.
Mahalliy kuzatuvchilarning fikricha, kuz va qishda non va tuxum bilan bog‘liq vaziyat yanada yomonlashishi kutilmoqda.
Izoh (0)