APL. “Chelsi” 5 ta, “Tottenhem” esa 4 ta gol urib yutdi (video)

14-sentabr, shanba kuni futbol bo‘yicha Angliya Premyer ligasining 5-turi doirasida navbatdagi 5 ta o‘yin yakunlandi.

Ole-Gunnar Sulsher qo‘l ostidagi “Manchester Yunayted” klubi “Old Trafford”da “Lester” bilan bahsga kirishdi.

Uchrashuvdagi yagona gol 8-daqiqada penaltidan urildi. Unga “mankunianlar” hujumchisi Markus Reshford mualliflik qildi.

Shu tariqa Manchester klubi o‘z uyida “Lester”ni kichik hisobda mag‘lubiyatga uchratdi (1:0).

Mazkur g‘alabadan so‘ng “Yunayted” ochkolari sonini 8 taga yetkazib, musobaqa jadvalida 4-o‘ringa ko‘tarilib oldi. Undan keyingi o‘rinda borayotgan “Lester” hisobida ham shuncha ochko mavjud.

Shu kuni Maurisio Pochettino boshqaruvidagi Londonning “Tottenhem” klubi o‘z maydonida “Kristal Pelas”ni sinovdan o‘tkazdi.

Bellashuv davomida “shporlar” yarim himoyachisi Son Hyon Min (10, 23) dublga erishgan bo‘lsa, Erik Lamela (42) ham o‘z nomiga bitta gol rasmiylashtirib qo‘ydi. “Kristal Pelas” himoyachisi Patrik van Anxolt o‘z darvozasini ishg‘ol qilib qo‘ydi.

Natijada londonliklar o‘z maydonida kechgan bahsda “Kristal Pelas” darvozasiga javobsiz 4 ta gol urib, 3 ochkoni qo‘lga kiritdi (4:0).

Ushbu g‘alabadan so‘ng “Tottenhem” 8 ochko jamg‘arib, musobaqa jadvalida 3-pog‘onadan joy egallab turibdi. “Kristal Pelas” esa 7 ochko to‘plab, 11-o‘rinda bormoqda.

Frenk Lempard boshliq Londonning “Chelsi” klubi esa “Vulverhempton” maydoniga safar qildi.

O‘yinda “aristokratlar” hujumchisi Temmi Abraham (34, 41, 55) het-trikka erishgan bo‘lsa, Fikayo Tomori (31) hamda Meyson Maunt (90) bittadan golga mualliflik qildi. “Bo‘rilar”dan esa Patrik Kutrone Kepa Arrisabalaga qo‘riqlayotgan darvozaga gol urdi. 69-daqiqada esa Abraham o‘z darvozasiga avtogol urib qo‘ydi.

Shu tariqa o‘yin 5:2 hisobida “Chelsi” foydasiga yakunlandi.

Qayd etish joiz, London klubi 8 ochko to‘plagan holda 6-o‘rinda bormoqda. “Vulverhempton” esa 3 ochko bilan 19-pog‘onadan joy olgan.