“Manchester Yunayted” “Real” futbolchisi uchun 75 mln yevro taklif qilgani ma’lum bo‘ldi

Yozgi transferlar vaqtida “Manchester Yunayted” “Real” yarim himoyachisi Toni Kroosni sotib olishga urinib ko‘rdi.

Sport Bild xabariga ko‘ra, “qizil iblislar” 29 yoshli xavbek uchun “Qirollik klubi”ga 75 million yevro taklif qilgan. Biroq Madrid jamoasi bu taklifga rozilik bildirmagan. Keyinroq esa tomonlar Pol Pogba transferiga Kroosni qo‘shish ustida muzokara olib borgan va yakunda murosaga kela olmagan.

Qayd etilishicha, klublar Toni transferini qishda yana muhokama qilishi mumkin.

Ma’lumot uchun, nemis futbolchisining “Real” bilan shartnomasi 2023-yil yozida yakuniga yetadi. U joriy mavsum klub safida 3 ta o‘yin o‘tkazib, 1 ta gol urdi.