Туркманистоннинг Тошҳовуз вилоятида ишлаб чиқарилаётган нонни еб бўлмай қолди, деб ёзади Turkmen.news.
Булка нони нафақат беъмаза, балки саломатлик учун зарарли ҳам бўлиб қолди.
«Бу қорамол учун мўлжалланган ем-хашак донидан тайёрланган қатрон унига жуда ўхшайди. Ноннинг ташқи кўриниши ва сифати бўйича стандарт талабларга жавоб бермаслигини тушуниш учун мутахассис бўлиш шарт эмас», — дейилади хабарда.
Дўкон расталарида сифатсиз нон жорий йилда вилоят ун ишлаб чиқарувчи корхоналари дондан ун ишлаб чиқара бошлаганидан кейин пайдо бўлди.
Ноннинг ташқи кўриниши, ҳиди, таъми — ишончсизлик уйғотади. Бундан ташқари, нон эртаси куни ғиштдек қотиб қолмоқда.
Юмшоқ қилиб айтганда, бундай нонни ейиш жуда хавфли. Инсоннинг ошқозонида муаммолар пайдо бўлганида у касаллик нон туфайли келиб чиққанини англамайди. Бироқ одамлар уни сотиб олмоқда. Чунки бундай нонлар жуда арзон. Яхши сифатли нон бозорда қиммат туради, бу нон эса 0,60 манат.
Мутахассислардан бири ноннинг сифати ёмонлашишига дон сифати ёмонлашгани сабаб бўлганини тахмин қилди. Бундай дон кўпроқ қорамол ва паррандаларга тўғри келади, ундан нон пишириш мақсадга мувофиқ эмас.
Бироқ, бундай сифатсиз дон пишмасдан, муддатидан олдин ўриб олинмоқда. Бу ҳаракат эса режани бажариш учун қилинмоқда.
Қайд этилишича, вилоятда тухум нархи ҳам ошган. Паррандачилик билан шуғулланаётган хусусий тадбиркорлар қийин вазиятда қолган.
Паррандалар озуқаси ва дон кундан кунга қимматлашмоқда.
Паррандалар учун мўлжалланган озиқанинг икки қопи 200 манат (11 доллар атрофида) туради. Бундай озиқани бир ҳафта аввал 50 манатга сотиб олса бўларди, бугун эса 60 манат сўрашмоқда.
Озиқа қимматлашиши ортидан тухумнинг ҳам нархи ошмоқда.
«Дўконда оқ тухум 1 манат туради, лекин аҳоли оқдан кўра жигарранг тухумни афзал кўради, бундай тухумнинг баҳоси эса бозорда 2 манат. Оқ тухум товуқчилик фермаларида, жигаррангги эса уй товуқларидан олинган», — дейди дўкон сотувчиси.
Маҳаллий кузатувчиларнинг фикрича, куз ва қишда нон ва тухум билан боғлиқ вазият янада ёмонлашиши кутилмоқда.
Изоҳ (0)