Наманган шаҳрида «Пахталиккўл» кичик саноат зонаси иш бошлади. Бу ҳақда «Дарё»га шаҳар ҳокимлиги матбуот хизмати маълум қилди.
Кичик саноат зонасига 2,8 гектар ер ажратилган бўлиб, бу ерда енгил саноат, қурилиш ва озиқ-овқат саноати йўналишларида умумий қиймати 41,5 миллиард сўмлик 15 та лойиҳа амалга оширилиши режалаштирилган. Мазкур лойиҳаларга мувофиқ, «Пахталиккўл»да импорт ўрнини босувчи ва экспортга йўналтирилган эркаклар ва болалар поябзаллари, костюм ва курткалар, атлас ва адрас матолари, қандолатчилик маҳсулотлари, ёғочни қайта ишлаш, мебель, металл панжара ва дарвозалар ишлаб чиқариш йўлга қўйилади.
Тадбиркорларга қулай шароитлар яратиб берилиши натижасида жорий йилнинг биринчи ярми якунига қадар кичик саноат зонасида умумий қиймати 26,2 миллиард сўмлик 10 та лойиҳа — корхоналар, хусусий ва якка тартибдаги тадбиркорлик субъектлари ишга туширилиб, уларда 840 та янги иш ўрни яратилди. Ҳудуддаги барча лойиҳалар тўлиқ ишга туширилса, уларнинг сони 1200 кишидан ошади.
Маълумот учун, Наманган шаҳрида жами 6 та кичик саноат зонаси ташкил этиш белгиланган. 124 гектар майдонини эгаллаган «Орзу», «Пахталиккўл», «Юксалиш», «Хонобод», «Машад» ва «Зарбдор»да режалаштирилган барча лойиҳалар тўлиқ қувват билан ишга туширилиши натижасида 16 мингдан ортиқ янги иш ўрни яратилади, умумий қиймати 1229,4 миллиард сўм бўлган 211 та лойиҳа амалга оширилади.
Изоҳ (0)