Тошкент шаҳар ҳокими Жаҳонгир Ортиқхўжаев пойтахт аҳолиси билан учрашиб, Чилонзор туманидаги Ғафур Ғулом номидаги маданият ва истироҳат боғида қандай ўзгаришлар бўлиши ҳақида маълумот берди. Бу ҳақда пойтахт ҳокимлиги матбуот хизмати хабар бермоқда.
Маълум қилинишича, қайта қуриш жараёнида парк эшиклари аҳоли учун ёпилмайди, шунингдек, паркка кириш шу вақтгача бўлганидек бепуллигича қолади. Шунингдек, реконструкция ишлари тадбиркорлар фаолиятига ҳам таъсир қилмаслиги, улар аввалгидек ўз ишларини давом эттиришлари мумкинлиги айтилган.
«Ушбу боғ соя-салқинлиги ва ўсимликлар дунёсига бойлиги билан ажралиб туради. Қайта қуриш жараёнида бу яшиллик дунёсига умуман зарар етказилмайди, ҳеч бир дарахт кесилмайди», — дейилади ҳокимлик ахборотида. Қайд этиш жоиз, 2018 йил августида Президент Шавкат Мирзиёев ушбу паркка кирганида уни қайта қуриш ҳақида топшириқ берган, бироқ бу жараёнда бирорта ҳам дарахт кесилмаслиги кераклигини таъкидлаган эди.
Ҳокимлик ахборотида таъкидланишича, боғдаги яроқлилик муддатини ўтаб бўлган аттракционлар янги, замонавийларига алмаштирилади. Парк ичидаги таъмирталаб йўллар созланади, велойўлаклар ҳам ташкил этилиши мумкин.
Изоҳ (0)