Toshkentda jamoat xavfsizligiga tahdid soluvchi axborot tarqatishda ayblanayotgan shaxslar ustidan sud ishi boshlandi. Bu haqda Oliy sud matbuot xizmati rahbari vazifasini bajaruvchi Aziz Obidov “Daryo”ga ma’lum qildi.
Jinoyat ishlari bo‘yicha Toshkent shahar sudida 6-sentabr, juma kuni sudlanuvchilar Rustambek Karimov (1975-yilda tug‘ilgan, muqaddam sudlangan, vaqtincha ishsiz) va To‘lqin Astanov (1971-yilda tug‘ilgan, muqaddam sudlanmagan, vaqtincha ishsiz)ga nisbatan jinoyat ishini ko‘rib chiqish bo‘yicha ochiq sud boshlandi. Mazkur jinoyat ishi jinoyat ishlari bo‘yicha Toshkent shahar sudi sudyasi Orif Qilichev raisligida ko‘rib chiqilmoqda.
Rustambek Karimov Jinoyat kodeksining 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 1-qismi, To‘lqin Astanov Jinoyat kodeksining 244-1-moddasi 3-qismi “g” bandida nazarda tutilgan jinoyatni sodir etganlikda ayblanmoqda.
Sud majlisida sudlanuvchilarning ko‘rsatmalari tinglandi. Sud jarayoni davom etmoqda.
Ma’lumot uchun, shu yilning 8-aprel kuni To‘lqin Astanov va Rustam Karimov O‘zbekiston Musulmonlar idorasiga filologiya fanlari nomzodi Ergash Ochilovning “Ma’rifat daftari” nomli kitobchasidan olingan “Sumalak” nomli hikoyacha bo‘yicha izoh so‘rab borgan.
Izohni shaxsan muftiy Usmonxon Alimov berishini talab qilishgan; “hazrat safardalar, o‘rnilariga, mana, o‘rinbosarlari — Abdulaziz Mansur bor”, deb idora vakillari shayx bilan uchrashtirgan.
U yerda idora raisi o‘rinbosari Abdulaziz Mansur bilan halol sertifikati, o‘quv yurtlarida hijob o‘rash mavzularida samimiy suhbat qurgani hamda Abdulaziz Mansur unga kitob hadya etganini bildirgan edi.
Mehmonlar shayxning javobidan qoniqmay, aytishlaricha, idorada to‘polon ko‘targan. Oxiri militsiyani chaqirishga to‘g‘ri kelgan. Militsiya esa 43 yoshli R.K. va va 47 yoshli A.T.ga nisbatan ma’muriy bayonnoma rasmiylashtirgan.
Izoh (0)