Davlat rahbarining 2018-yil 13-aprelda Sirdaryo viloyati Sayxunobod tumanida viloyat faollari bilan uchrashuvda qo‘shni Tojikiston bilan chegaradosh Xovos tumanidagi “Chambil”, “Farhod” va “Bobur” suv iste’molchilari uyushmalari hududida oqova suv ta’minotidagi muammolarni hal qilib berish bo‘yicha aholidan murojaat qilingandi.
Sirdaryo viloyati prokuraturasi Jamoatchilik bilan aloqalar va huquqiy axborot tarmog‘ining “Daryo”ga xabar berishicha, Prezident tomonidan aholi murojaatiga darhol e’tibor qaratildi hamda ushbu topshiriqlar ijrosini nazorat qilish viloyat prokuraturasiga yuklatildi.
O‘tgan yil bahor oylarida boshlangan kanal qurilishida o‘ndan ortiq maxsus texnika va mingdan ortiq ishchilar qatnashdi. Loyiha qiymati 23 millard so‘mga teng bo‘lgan inshootning barpo etilishi bilan soniyasiga 2,2 metr kub suv o‘tkazish quvvatiga ega bo‘lgan zamonaviy nasos stansiyasi ham qurib bitkazildi.
Uzunligi 11 kilometrni tashkil etadigan mazkur kanal qurilishida 5 126 mer kub beton ishlari bajarildi. Mazkur loyihaning ahamiyati haqida gapiradigan bo‘lsak, inshoot ishga tushirilishi bilan tumanning “Chambil”, “Farhod” va “Bobur” suv iste’molchilari uyushmalari hududidagi 4 ming gektar yer hamda 3 yarim mingta aholi xonadonlari ekin maydonlari va tomorqa xo‘jaliklaridagi suv ta’minoti yaxshilandi.
Prezident topshiriqlari ijrosi ta’minlandi va sirdaryoliklar hayotidagi bu tarixiy voqea — kanal qurilishi insonlar hayoti farovonligi yo‘lida yana bir muhim qadam bo‘ldi.
Respublika “Nuroniy” jamg‘armasining Xovos tumani bo‘limi raisi Jumaboy Suyunov va mahalla oqsoqoli Xidir Yusupov ko‘p yillik orzulari amalga oshganligidan minnatdor bo‘lib, shukronalik bildirdi, deyiladi xabarda.
Izoh (0)