Angorlik 78 yoshli abituriyent test sinovidan muvaffaqiyatli o‘ta olmadi

Toshkent davlat agrar universitetining Termiz filialiga Angor tumanidan 78 yoshli otaxon Mamatqul Berdaliyev ham o‘z hujjatlarini topshirgani haqida xabar berilgandi. Otaxon imtihonlarda faol ishtirok etgan, biroq o‘qishga kira olmagan. Bu haqda universitet filialining matbuot kotibiga tayanib, O‘zA xabar berdi.

“Afsuski otaxonning bu yilgi to‘plagan ballari talabalik baxtiga muyassar bo‘lishga biroz kamlik qildi. Ammo Mamatqul bobo kelasi yili yana hujjatlarini topshirishini, ungacha esa fanlardan o‘qib tayyorgarlik ko‘rishini ta’kidlab o‘tdilar. Otaxon bu yilgi imtihonda 42,1 ball to‘pladilar. Shu yoshda shuncha ball to‘plashning o‘zi bir mahorat”, — deydi Toshkent davlat agrar universitetining Termiz filiali matbuot kotibi Hamid Norqobilov.

Eslatib o‘tamiz, bu yilgi test imtihonlarida yosh cheklovi bekor qilingani sabab nuroniylar ham talaba bo‘lish umidida oliy o‘quv yurtlariga hujjat topshirgan. Davlat test markazi ma’lumotlariga qaraganda, 25 yoshdan kichik abituriyentlar — 862 977 nafar, 25-30 yosh oralig‘ida — 103 276 nafar, 40-50 yoshlilar — 14 014, 50 yoshdan kattalar esa 672 nafarni tashkil etgan.