Тошкент давлат аграр университетининг Термиз филиалига Ангор туманидан 78 ёшли отахон Маматқул Бердалиев ҳам ўз ҳужжатларини топширгани ҳақида хабар берилганди. Отахон имтиҳонларда фаол иштирок этган, бироқ ўқишга кира олмаган. Бу ҳақда университет филиалининг матбуот котибига таяниб, ЎзА хабар берди.
«Афсуски отахоннинг бу йилги тўплаган баллари талабалик бахтига муяссар бўлишга бироз камлик қилди. Аммо Маматқул бобо келаси йили яна ҳужжатларини топширишини, унгача эса фанлардан ўқиб тайёргарлик кўришини таъкидлаб ўтдилар. Отахон бу йилги имтиҳонда 42,1 балл тўпладилар. Шу ёшда шунча балл тўплашнинг ўзи бир маҳорат», — дейди Тошкент давлат аграр университетининг Термиз филиали матбуот котиби Ҳамид Норқобилов.
Эслатиб ўтамиз, бу йилги тест имтиҳонларида ёш чеклови бекор қилингани сабаб нуронийлар ҳам талаба бўлиш умидида олий ўқув юртларига ҳужжат топширган. Давлат тест маркази маълумотларига қараганда, 25 ёшдан кичик абитуриентлар — 862 977 нафар, 25-30 ёш оралиғида — 103 276 нафар, 40-50 ёшлилар — 14 014, 50 ёшдан катталар эса 672 нафарни ташкил этган.
Изоҳ (0)