Joriy yil avgust oyida Ahmadjon A. jiddiy xastalikka chalingan o‘g‘li uchun mablag‘ to‘plashni iltimos qilib, ijtimoiy tarmoqlar orqali barchaga murojaat qildi. Shu tariqa qimmat operatsiya uchun 24.596.000 to‘plashga muvaffaq bo‘lindi. Bu haqda IIBB matbuot xizmati ma’lum qildi.
Telegram messenjeridagi guruhlardan birida mazkur e’lonni ko‘rib qolgan noma’lum shaxslar ko‘rsatilgan raqamga qo‘ng‘iroq qilib, kartaga pul o‘tkazishlarini aytib, tasdiqlovchi kod raqamini so‘raydi. Shundan so‘ng e’longa ilova qilingan 16 raqamli karta kodidan foydalanib, yuqoridagi summani to‘lig‘icha o‘z hisob raqamiga o‘tkazib oladi.
Ahmadjon Toshkent shahar IIBBga murojaat qildi. Ushbu holat yuzasidan JKning 168-moddasi (“Firibgarlik”) bilan jinoyat ishi qo‘zg‘atildi.
IIBB xodimlari tomonidan mazkur jinoyatni sodir etganlikda gumon qilinib Farg‘ona viloyatida oldinroq o‘g‘irlik va firibgarligi uchun sudlangan 17 yashar Nurulloxon M. Qo‘lga olindi. So‘roq chog‘ida u ushbu jinoyatni 19 yashar Avazxon Yu. Bilan birga amalga oshirganini tan olgan. Uning kvartirasidan tintuv chog‘i ashyoviy dalillar tariqasida plastik karta, 700 dollar, 464.000 so‘m va Samsung A30 telefoni topilgan.
Tezkor tergov tadbirlari davomida ushbu shaxslar yuqoridagidek usullar bilan kasal qizning otasi bilan bog‘lanib, bank kartasidagi 18.122.781 so‘mni o‘z hisoblariga tushirib olgani aniqlandi. Hozirda ularning shunga o‘xshash boshqa jinoyatlarga aloqadorligi va boshqa sheriklari bor-yo‘qligi tekshirilmoqda.
“Hurmatli fuqarolar! Hech qachon bank kartalaringiz raqamlari, ayniqsa, tasdiqlovchi kodlarni notanish shaxslarga ma’lum qilmang”, — deyiladi IIBB xabarida.
Izoh (0)