Mustaqillikning 28 yilligi munosabati bilan Namanganda viloyat hokimligi tomonidan tashkillashtirilgan katta bayram mushakbozligi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Buning uchun tajribali mutaxassislar jalb qilingan va ular bir hafta davomida tayyorgarlik ishlarini olib borgan.
1-sentabr kuni 21:00 ga yaqin Namangan shahridagi “Afsonalar vodiysi” bog‘iga minglab namanganliklar va qo‘shni viloyatlardan kelgan mehmonlar to‘plandi. Ular orasida ijtimoiy tarmoqlarda Dima Qayum nomi bilan tanilgan farg‘onalik bloger Dilshod Boltaboyev ham bor edi.
—36 yoshga kirib, to‘g‘risi, bunaqangi mushakbozlikni ko‘rmaganman. O‘zi ham naq 10 daqiqaga yaqin otildi-yov. Asosiysi, xalqning kayfiyati ko‘tarinki. Buni yon-atrofimdagi odamlarni kuzatib ham sezdim, — deydi Dilshod.
Hisob-kitoblarga ko‘ra, shu kuni 80 xil rangda 1150 ta mushak otilgan. Eng kuchli salyutning balandligi esa 300 metrdan oshgan.
Qayd etish joizki, bu yilgi bayram salyuti Namanganda o‘tkazilgan mushakbozlik tarixida eng balandi bo‘ldi.
Izoh (0)