O‘zbekistonda ilk marta maktablarda ta’lim sifatining holatini xarakterlovchi reyting indikatorlarini ishlab chiqildi. Vazirlar Mahkamasi huzuridagi Ta’lim sifatini nazorat qilish davlat inspeksiyasidan xabar berishlaricha, Xalq ta’limi vazirligi bilan hamkorlikda ishchi guruh tuzilib, indikatorlar va baholash mezonlari muhokama qilingan.
Muhokama jarayonida xorijiy tajribalar tahlil qilinib, xorijiy davlatlarda maktablar reytingi aksariyat holatlarda xalqaro bilimni baholash tadqiqotlari natijalariga bog‘langani aniqlangan. Mahalliy va xalqaro tajribalar hamda mutaxassislarning fikr-mulohazalaridan kelib chiqib, Davlat inspeksiyasi va Xalq ta’limi vazirligi maktablarning reytingini aniqlash mezonlarini shakllantirgan.
Mezonlar to‘rtta ko‘rsatkich asosidan ishlab chiqilgan:
- bitiruvchi o‘quvchilarning fanlar bo‘yicha ta’lim tayyorgarlik darajasi va sifat ko‘rsatkichi;
- 9-sinf o‘quvchilarining bilim darajasi;
- oliy va birinchi toifali o‘quvchilar ulushi;
- maktab o‘quvchilari va pedagog jamoasi o‘rtasida o‘tkaziladigan so‘rovnoma natijalari.
Respublika bo‘yicha Qoraqalpog‘iston, Toshkent shahri va viloyatlardagi barcha tuman (shahar)lardan 10 foiz (jami 956 ta) maktablarning faoliyati tahlil qilingan va 2019-yil 1-iyul holatiga ularning reyting natijalari tayyorlangan.
Joriy yilda reytingga jalb qilinadigan maktablar ro‘yxati ularning umumiy soniga nisbatan 10 foiz miqdorda tuman (shahar) xalq ta’limi bo‘limlari tomonidan shakllantirilgan va Xalq ta’limi vazirligi tomonidan tasdiqlangan.
Eng yuqori o‘rinlarni egallagan Top-20 talikka Xorazmdan 7 ta, Namangandan 4 ta, Farg‘onadan 4 ta, Buxorodan 2 tadan, Andijon, Qashqadaryo va Surxondaryo viloyatlaridan 1 tadan maktablar kirgan.
Eng pastki o‘rinlarni Samarqanddan 10 ta, Toshkent viloyatidan 6 ta, Qashqadaryodan 2 ta, Buxoro va Navoiy viloyatlaridan 1 tadan maktablar egallagan.
Hududlar reytingida eng yuqori o‘rinlarni Namangan, Xorazm va Navoiy viloyatlari egallagan bo‘lsa, quyi o‘rinlarda Qoraqalpog‘iston, Samarqand va Toshkent viloyatlari qayd etilgan.
9-sinf o‘quvchilarining bilim darajasini aniqlash bo‘yicha o‘tkazilgan nazorat ishlarida jami 25 188 nafar o‘quvchi qatnashgan va ularning 73,1 foizi ona tilidan diktantdan va 48,2 foizi matematikadan yozma ishdan ijobiy baholangan.
Diktant bo‘yicha eng yuqori natijalar Navoiy, Buxoro, Namangan viloyatlarida va eng past natijalar Toshkent shahri, Samarqand va Toshkent viloyatlarida qayd etilgan.
Matematikadan yozma ish bo‘yicha eng yuqori natijalar Xorazm, Navoiy, Namangan viloyatlarida va eng past natijalar Toshkent, Samarqand va Buxoro viloyatlarida qayd etilgan.
Oliy va birinchi toifali o‘qituvchilar ulushi bo‘yicha yuqori o‘rinlarda Xorazm va Andijon viloyatlari hamda Toshkent shahri bo‘lsa, quyi o‘rinlarda Qashqadaryo, Surxondaryo va Samarqand viloyatlari maktablari aniqlangan.
Izoh (0)