Ўзбекистонда илк марта мактабларда таълим сифатининг ҳолатини характерловчи рейтинг индикаторларини ишлаб чиқилди. Вазирлар Маҳкамаси ҳузуридаги Таълим сифатини назорат қилиш давлат инспекциясидан хабар беришларича, Халқ таълими вазирлиги билан ҳамкорликда ишчи гуруҳ тузилиб, индикаторлар ва баҳолаш мезонлари муҳокама қилинган.
Муҳокама жараёнида хорижий тажрибалар таҳлил қилиниб, хорижий давлатларда мактаблар рейтинги аксарият ҳолатларда халқаро билимни баҳолаш тадқиқотлари натижаларига боғлангани аниқланган. Маҳаллий ва халқаро тажрибалар ҳамда мутахассисларнинг фикр-мулоҳазаларидан келиб чиқиб, Давлат инспекцияси ва Халқ таълими вазирлиги мактабларнинг рейтингини аниқлаш мезонларини шакллантирган.
Мезонлар тўртта кўрсаткич асосидан ишлаб чиқилган:
- битирувчи ўқувчиларнинг фанлар бўйича таълим тайёргарлик даражаси ва сифат кўрсаткичи;
- 9-синф ўқувчиларининг билим даражаси;
- олий ва биринчи тоифали ўқувчилар улуши;
- мактаб ўқувчилари ва педагог жамоаси ўртасида ўтказиладиган сўровнома натижалари.
Республика бўйича Қорақалпоғистон, Тошкент шаҳри ва вилоятлардаги барча туман (шаҳар)лардан 10 фоиз (жами 956 та) мактабларнинг фаолияти таҳлил қилинган ва 2019 йил 1 июль ҳолатига уларнинг рейтинг натижалари тайёрланган.
Жорий йилда рейтингга жалб қилинадиган мактаблар рўйхати уларнинг умумий сонига нисбатан 10 фоиз миқдорда туман (шаҳар) халқ таълими бўлимлари томонидан шакллантирилган ва Халқ таълими вазирлиги томонидан тасдиқланган.
Энг юқори ўринларни эгаллаган Топ-20 таликка Хоразмдан 7 та, Намангандан 4 та, Фарғонадан 4 та, Бухородан 2 тадан, Андижон, Қашқадарё ва Сурхондарё вилоятларидан 1 тадан мактаблар кирган.
Энг пастки ўринларни Самарқанддан 10 та, Тошкент вилоятидан 6 та, Қашқадарёдан 2 та, Бухоро ва Навоий вилоятларидан 1 тадан мактаблар эгаллаган.
Ҳудудлар рейтингида энг юқори ўринларни Наманган, Хоразм ва Навоий вилоятлари эгаллаган бўлса, қуйи ўринларда Қорақалпоғистон, Самарқанд ва Тошкент вилоятлари қайд этилган.
9-синф ўқувчиларининг билим даражасини аниқлаш бўйича ўтказилган назорат ишларида жами 25 188 нафар ўқувчи қатнашган ва уларнинг 73,1 фоизи она тилидан диктантдан ва 48,2 фоизи математикадан ёзма ишдан ижобий баҳоланган.
Диктант бўйича энг юқори натижалар Навоий, Бухоро, Наманган вилоятларида ва энг паст натижалар Тошкент шаҳри, Самарқанд ва Тошкент вилоятларида қайд этилган.
Математикадан ёзма иш бўйича энг юқори натижалар Хоразм, Навоий, Наманган вилоятларида ва энг паст натижалар Тошкент, Самарқанд ва Бухоро вилоятларида қайд этилган.
Олий ва биринчи тоифали ўқитувчилар улуши бўйича юқори ўринларда Хоразм ва Андижон вилоятлари ҳамда Тошкент шаҳри бўлса, қуйи ўринларда Қашқадарё, Сурхондарё ва Самарқанд вилоятлари мактаблари аниқланган.
Изоҳ (0)