Toshkentda 28-avgust kuni yangi qurilayotgan Riviera savdo-ko‘ngilochar majmuasining metall konstruksiyasi qulashi oqibatida to‘rt kishi halok bo‘ldi. Yana ikki kishi o‘rta va og‘ir darajadagi tan jarohatlari bilan Respublika shoshilinch tibbiy yordam ilmiy markaziga yotqizilgan.
Riviera’ning qurilishiga bosh-qosh bo‘lgan The Tower Mall Management Group kompaniyasining ma’lum qilishicha, obyektdagi qurilish ishlari yuz bergan hodisaning barcha tafsilotlari aniqlanib, aniq sabablari o‘rnatilguniga qadar to‘xtatilgan.
Hodisa joyida xulosa tayyorlashi kerak bo‘lgan ekspertlar guruhi ish olib bormoqda. Kompaniya hodisa oqibatida tan jarohati olgan va halok bo‘lganlarning oila a’zolariga moddiy yordam berish va to‘liq ko‘mak ko‘rsatishga va’da berdi.
29-avgust kuni Toshkent shahar prokuraturasi hodisa yuzasidan jinoyat ishi qo‘zg‘atilgani (aynan qaysi modda bo‘yicha qo‘zg‘atilgani aytilmagan) va tergovoldi tekshiruv ishlari boshlanganini xabar qildi. Idora axborotida obyektda metall tomning bir qismi qulagani ta’kidlangan.'
“Gazeta.uz” muxbiri 28-avgust, chorshanba kuni qurilayotgan obyekt hududida bo‘lib qaytgan. Bo‘lajak majmua haqidagi bannerdagi ma’lumotlarga ko‘ra, uning umumiy maydoni 40,3 ming kvadrat metr, ijaraga olish mumkin bo‘lgan qismi 18,4 ming kvadrat metr bo‘ladi, avtoturargohining sig‘imi esa 471 mashinaga mo‘ljallangan.
Loyihani kim amalga oshirmoqda?
Loyiha buyurtmachisi — “Hamkor Savdo” kompaniyasi. Boshqaruvchi kompaniya sifatida The Tower Mall Management Group, bosh pudratchi sifatida “Qurilish Universal Kompakt Servis” (amalga oshirgan loyihalari: Toshkentdagi Janubiy vokzal, Namangan vokzali va “O‘zbekiston temir yo‘llari” buyurtma qilgan boshqa loyihalar), loyiha mualliflari sifatida mb architects (amalga oshirgan loyihalari: Janubiy vokzal, Compass savdo-ko‘ngilochar majmuasi, Mega Astana, Moskvadagi “Yevropeyskiy” turar joy majmuasi va boshqalar), bosh loyihalovchi sifatida “Invest Proekt Servis” ko‘rsatilgan.Qurilish “Qurilish Universal Kompakt Servis” kompaniyasi tomonidan amalga oshirilmoqda. Yagona interaktiv davlat xizmatlari portalidagi Tadbirkorlar reyestriga ko‘ra, qurilish metall konstruksiyalari va buyumlari ishlab chiqarishga ixtisoslashgan Unique Trade Business kompaniyasi uning ta’sischisi hisoblanadi. Iyun oyida ushbu kompaniya Golden House Development’ning 76 foiz ulushi egasiga aylangan.
Obyektdagi qurilish ishlari 2019-yilning birinchi choragida yakuniga yetishi kerak edi. The Tower Mall Management Group’dan “Gazeta.uz”ga ma’lum qilishlaricha, Riviera savdo-ko‘ngilochar majmuasini qurish loyihasi 2018-yil kuzida boshlangan bo‘lib, Compass savdo-ko‘ngilochar majmuasini qurish bilan birga olib borilgan. Kompaniya rahbariyati asosiy e’tiborni Compass’ga qaratib, uni birinchi ishga tushirishga qaror qilgan. Har ikkala loyiha kompaniyaning o‘z mablag‘lari hisobidan amalga oshirilmoqda.
Riviera majmuasi Olmazor tumanidagi Nurafshon va Sebzor ko‘chalari kesishmasida qurilmoqda. Mollning eng asosiy o‘ziga xosligi — unda barcha fudkort nuqtalarida chiqish imkoni bo‘lgan veranda bo‘ladi. Riviera’da, shuningdek, yil davomida ishlaydigan yaxmalak va oltita kinoteatr bo‘lishi ham ko‘zda tutilgan.
28-avgust kuni hodisa joyida ko‘chma kriminalistik laboratoriya, Toshkent shahar IIBB patrul-post xizmati, Milliy gvardiya va O‘zbekiston FVV xodimlari bo‘lgan. “Gazeta.uz” muxbiri qurilish maydonidagi ishchilar va ularning boshliqlaridan izoh ololmagan. Ular Toshkent hokimligidan shunday buyruq bo‘lgan deb, savollarga javob berishdan bosh tortgan.
Ishchilar obyektning tashqaridan suratga olinishiga qarshilik qilib, bu “yuqoridan bo‘lgan buyruq” deya jurnalistning videokamerasini tortib olishga uringan, shundan so‘ng Milliy gvardiya harbiy xizmatchilarini chaqirishgan. Milliy gvardiya vakili: “Bugun suratga olish mumkin emas, ertaga — mumkin”, deb aytgan.
Izoh (0)