Тошкентда 28 август куни янги қурилаётган Riviera савдо-кўнгилочар мажмуасининг металл конструксияси қулаши оқибатида тўрт киши ҳалок бўлди. Яна икки киши ўрта ва оғир даражадаги тан жароҳатлари билан Республика шошилинч тиббий ёрдам илмий марказига ётқизилган.
Riviera’нинг қурилишига бош-қош бўлган The Tower Mall Management Group компаниясининг маълум қилишича, объектдаги қурилиш ишлари юз берган ҳодисанинг барча тафсилотлари аниқланиб, аниқ сабаблари ўрнатилгунига қадар тўхтатилган.
Ҳодиса жойида хулоса тайёрлаши керак бўлган экспертлар гуруҳи иш олиб бормоқда. Компания ҳодиса оқибатида тан жароҳати олган ва ҳалок бўлганларнинг оила аъзоларига моддий ёрдам бериш ва тўлиқ кўмак кўрсатишга ваъда берди.
29 август куни Тошкент шаҳар прокуратураси ҳодиса юзасидан жиноят иши қўзғатилгани (айнан қайси модда бўйича қўзғатилгани айтилмаган) ва терговолди текширув ишлари бошланганини хабар қилди. Идора ахборотида объектда металл томнинг бир қисми қулагани таъкидланган.'
«Gazeta.uz» мухбири 28 август, чоршанба куни қурилаётган объект ҳудудида бўлиб қайтган. Бўлажак мажмуа ҳақидаги баннердаги маълумотларга кўра, унинг умумий майдони 40,3 минг квадрат метр, ижарага олиш мумкин бўлган қисми 18,4 минг квадрат метр бўлади, автотураргоҳининг сиғими эса 471 машинага мўлжалланган.
Лойиҳани ким амалга оширмоқда?
Лойиҳа буюртмачиси — «Ҳамкор Савдо» компанияси. Бошқарувчи компания сифатида The Tower Mall Management Group, бош пудратчи сифатида «Қурилиш Универсал Компакт Сервис» (амалга оширган лойиҳалари: Тошкентдаги Жанубий вокзал, Наманган вокзали ва «Ўзбекистон темир йўллари» буюртма қилган бошқа лойиҳалар), лойиҳа муаллифлари сифатида mb architects (амалга оширган лойиҳалари: Жанубий вокзал, Compass савдо-кўнгилочар мажмуаси, Mega Astana, Москвадаги «Европейский» турар жой мажмуаси ва бошқалар), бош лойиҳаловчи сифатида «Инвест Проэкт Сервис» кўрсатилган.Қурилиш «Қурилиш Универсал Компакт Сервис» компанияси томонидан амалга оширилмоқда. Ягона интерактив давлат хизматлари порталидаги Тадбиркорлар реестрига кўра, қурилиш металл конструксиялари ва буюмлари ишлаб чиқаришга ихтисослашган Unique Trade Business компанияси унинг таъсисчиси ҳисобланади. Июнь ойида ушбу компания Golden House Development’нинг 76 фоиз улуши эгасига айланган.
Объектдаги қурилиш ишлари 2019 йилнинг биринчи чорагида якунига етиши керак эди. The Tower Mall Management Group’дан «Gazeta.uz»га маълум қилишларича, Riviera савдо-кўнгилочар мажмуасини қуриш лойиҳаси 2018 йил кузида бошланган бўлиб, Compass савдо-кўнгилочар мажмуасини қуриш билан бирга олиб борилган. Компания раҳбарияти асосий эътиборни Compass’га қаратиб, уни биринчи ишга туширишга қарор қилган. Ҳар иккала лойиҳа компаниянинг ўз маблағлари ҳисобидан амалга оширилмоқда.
Riviera мажмуаси Олмазор туманидаги Нурафшон ва Себзор кўчалари кесишмасида қурилмоқда. Моллнинг энг асосий ўзига хослиги — унда барча фудкорт нуқталарида чиқиш имкони бўлган веранда бўлади. Riviera’да, шунингдек, йил давомида ишлайдиган яхмалак ва олтита кинотеатр бўлиши ҳам кўзда тутилган.
28 август куни ҳодиса жойида кўчма криминалистик лаборатория, Тошкент шаҳар ИИББ патрул-пост хизмати, Миллий гвардия ва Ўзбекистон ФВВ ходимлари бўлган. «Gazeta.uz» мухбири қурилиш майдонидаги ишчилар ва уларнинг бошлиқларидан изоҳ ололмаган. Улар Тошкент ҳокимлигидан шундай буйруқ бўлган деб, саволларга жавоб беришдан бош тортган.
Ишчилар объектнинг ташқаридан суратга олинишига қаршилик қилиб, бу «юқоридан бўлган буйруқ» дея журналистнинг видеокамерасини тортиб олишга уринган, шундан сўнг Миллий гвардия ҳарбий хизматчиларини чақиришган. Миллий гвардия вакили: «Бугун суратга олиш мумкин эмас, эртага — мумкин», деб айтган.
Изоҳ (0)