O‘zbekiston mustaqilligining 28 yilligi munosabati bilan Prezident Shavkat Mirziyoyev nomiga xorijiy davlatlar rahbarlaridan samimiy qutlovlar kelishi davom etmoqda.
Ularda davlat rahbariga muvaffaqiyatlar, O‘zbekiston xalqiga ravnaq va farovonlik tilab, ezgu istaklar izhor etilgan.
“Tarixan qisqa davrda O‘zbekiston siyosiy va ijtimoiy-iqtisodiy sohalarda ulkan muvaffaqiyatlarga erishdi hamda xalqaro maydonda o‘z nufuzini mustahkamladi. Qozog‘iston bilan O‘zbekiston o‘rtasidagi munosabatlarni yuksak baholab, bu hamkorlik bundan buyon ham xalqlarimiz farovonligi yo‘lida rivojlanishiga ishonch bildiraman”, — deyiladi Qozog‘iston birinchi prezidenti Nursulton Nazarboyevning tabrigida.
Shu bilan birga Qozog‘iston prezidenti Qosim-Jo‘mart Toqayev ham o‘zining samimiy tilaklarini izhor etgan.
“Yaxshi qo‘shnichilik, do‘stlik va o‘zaro anglashuv tamoyillariga asoslangan Turkmaniston – O‘zbekiston munosabatlari xalqlarimiz farovonligi yo‘lida yanada rivojlanishi va mustahkamlanishiga qat’iy ishonaman”, — deyiladi Turkmaniston prezidentining tabrigida.
Turkiya prezidenti Rajab Toyyib Erdo‘g‘on ham o‘z qutlovlarini yuborib, 2017-yilda strategik sheriklik darajasiga ko‘tarilgan ikki davlat munosabatlarini mushtarak sa’y-harakatlar bilan har tomonlama yanada chuqurlashtirishga umid bildirgan.
“O‘ylaymanki, mening joriy yil aprel oyida O‘zbekistonga amalga oshirgan davlat tashrifim mamlakatlarimizning samimiy birodarlik aloqalari bilan bog‘langanini yana bir bor tasdiqladi. Shu munosabat bilan yangi, alohida strategik sheriklik darajasiga ko‘tarilgan ikki tomonlama munosabatlarimiz sifatli rivojlanishi uchun yaqin hamkorligimiz davom etadi deb ishonaman”, — deydi o‘z qutlovida Janubiy Koreya prezidenti Mun Chje In.
Shuningdek, Qirg‘iziston prezidenti Sooranbay Jeenbekov, Tojikiston prezidenti Emomali Rahmondan ham tabriklar kelib ulgurgan.
Izoh (0)