Ўзбекистон мустақиллигининг 28 йиллиги муносабати билан Президент Шавкат Мирзиёев номига хорижий давлатлар раҳбарларидан самимий қутловлар келиши давом этмоқда.
Уларда давлат раҳбарига муваффақиятлар, Ўзбекистон халқига равнақ ва фаровонлик тилаб, эзгу истаклар изҳор этилган.
«Тарихан қисқа даврда Ўзбекистон сиёсий ва ижтимоий-иқтисодий соҳаларда улкан муваффақиятларга эришди ҳамда халқаро майдонда ўз нуфузини мустаҳкамлади. Қозоғистон билан Ўзбекистон ўртасидаги муносабатларни юксак баҳолаб, бу ҳамкорлик бундан буён ҳам халқларимиз фаровонлиги йўлида ривожланишига ишонч билдираман», — дейилади Қозоғистон биринчи президенти Нурсултон Назарбоевнинг табригида.
Шу билан бирга Қозоғистон президенти Қосим-Жўмарт Тоқаев ҳам ўзининг самимий тилакларини изҳор этган.
«Яхши қўшничилик, дўстлик ва ўзаро англашув тамойилларига асосланган Туркманистон – Ўзбекистон муносабатлари халқларимиз фаровонлиги йўлида янада ривожланиши ва мустаҳкамланишига қатъий ишонаман», — дейилади Туркманистон президентининг табригида.
Туркия президенти Ражаб Тоййиб Эрдўғон ҳам ўз қутловларини юбориб, 2017 йилда стратегик шериклик даражасига кўтарилган икки давлат муносабатларини муштарак саъй-ҳаракатлар билан ҳар томонлама янада чуқурлаштиришга умид билдирган.
«Ўйлайманки, менинг жорий йил апрель ойида Ўзбекистонга амалга оширган давлат ташрифим мамлакатларимизнинг самимий биродарлик алоқалари билан боғланганини яна бир бор тасдиқлади. Шу муносабат билан янги, алоҳида стратегик шериклик даражасига кўтарилган икки томонлама муносабатларимиз сифатли ривожланиши учун яқин ҳамкорлигимиз давом этади деб ишонаман», — дейди ўз қутловида Жанубий Корея президенти Мун Чже Ин.
Шунингдек, Қирғизистон президенти Сооранбай Жээнбеков, Тожикистон президенти Эмомали Раҳмондан ҳам табриклар келиб улгурган.
Изоҳ (0)