24—26 август кунлари футбол бўйича Англия Премьер лигасида 3-тур ўйинлари ўтказилди. Қизиқарли ва кескин курашларга бой ўтган тур тафсилотларини «Дарё» анъанага мувофиқ мухлисларга тақдим этади.
«Норвич»—«Челси»
Дастлабки 2 турда атиги 1 очко жамғарган Фрэнк Лэмпард шогирдлари ўтган ўйинда ғалабага эришган «Норвич» меҳмони бўлди. Лондон клуби учун ўйин омадли бошланди. «Аристократлар»нинг янги 9-рақами Тэмми Абраҳам 3-дақиқадаёқ «Норвич» дарвозасини ишғол қилди. Бироқ Лэмпарднинг қувончи худди жамоасиники каби узоққа чўзилмади. Орадан уч дақиқа ўтиб АПЛда тўпурар бўлиб турган Теему Пуккининг узатмасидан сўнг Тодд Кантуэлл Кепа дарвозасини ишғол қилди. 17-дақиқада эса ўтган ўйинда ҳам гол урган Мэйсон Маунт «Челси»ни ҳисобда олдинга олиб чиқди. Орадан 13 дақиқа ўтиб, Пуккининг ўзи бу сафар ҳисобни тенглаштирди. Иккинчи бўлимнинг 68-дақиқасида яна Абраҳам катта саҳнага чиқди. 21 ёшли ҳужумчи Матео Ковачичнинг ажойиб узатмасини голга айлантирди. Шу тариқа «Челси» Премьер лигада Фрэнк Лэмпард қўл остидаги дастлабки ғалабасини қўлга киритди.
«Манчестер Юнайтед»—«Кристал Пэлас»
Мавсумни ёмон бошламаган Оле-Гуннар Сульшер жамоаси 3-тур доирасида «Кристал Пэлас»ни ўз майдонида қабул қилди. Беллашувда ҳисобни меҳмонлар 32-дақиқага келиб очди. Дарвозабон Висенте Гуаитанинг узатмасини Жеффри Шлупп олдинга интилган Жордан Айюга ташлаб берди. Африкалик футболчи эса Давид де Хеани осонлик билан доғда қолдиришга эришди. Биринчи бўлимда мухлислар бошқа гол кўрмади. 70-дақиқада ҳакам меҳмонлар дарвозасига пенальти белгиланди. Уни эса Маркус Рэшфорд аниқ амалга ошира олмади. Тўп дарвоза устунига тегиб, майдон ташқарисига йўл олди. Қайд этиш жоиз, ўтган ўйинда Пол Погба ҳам 11 метрлик жарима зарбасини кўкка совурганди. Ўйиннинг кулиминацион нуқтаси эса сўнгги дақиқаларга тўғри келди. Аввалига Дэниэл Жеймс чиройли голи билан ҳисобни тенглаштирган бўлса, орадан 4 дақиқа ўтиб, Заҳа—ван Анҳолт комбинациясини нидерландиялик футболчининг ўзи гол билан якунлади. Шу тариқа «Манчестер Юнайтед» барча мусобақаларни ҳисобга олганда 18 та ўйинда илк бор «бургутлар»га мағлуб бўлди.
«Ливерпуль»—«Арсенал»
Мусобақанинг ортда қолган 2 турида 100 фоизлик натижа қайд этган Мерсисайд ва Лондон клуби «Энфилд» стадионида мусобақанинг якка ҳокимлиги учун майдонга тушди. Ўйиндаги 4 та голдан дастлабки 3 таси мезбонлар ҳисобига ёзилди. Аввалига Жоэл Матип ҳисобни очган бўлса, иккинчи бўлим аввалида Давид Луиснинг қўполлиги сабаб белгиланган пенальтини Муҳаммад Салоҳ «Арсенал» дарвозасига жойлаб қўйди. Орадан 9 дақиқа ўтиб, Салоҳ Фабиньонинг узатмасидан сўнг «тўпчилар» ҳимоячиларидан бирин-кетин қочиб кетди ва Бернд Лено дарвозасига ўйиндаги ўзининг иккинчи голини урди. «Арсенал» ягона голига эса 85-дақиқада уругвайлик Лукас Торрейра муаллифлик қилди. Қайд этиш жоиз, Торрейра 61-дақиқада Дани Себальоснинг ўрнига захирадан майдонга тушганди.
Юрген Клопп жамоаси 3-турдан сўнг йўқотишсиз одимлаётган ягона жамоа бўлиб турибди.
«Борнмут»—«Манчестер Сити»
Ўтган турда «Тоттенҳэм» билан дуранг ўйнаб қўйган Хосеп Гвардиола шогирдлари бу сафар «Борнмут» майдонига сафар қилди. Учрашувда ҳисобни 15-дақиқада Кевин де Брюйненинг узатмасидан сўнг Серхио Агуэро очди. 43-дақиқада эса Раҳим Стерлинг Давид Сильванинг узатмасини голга айлантириб, «Сити»нинг устунлигини мустаҳкамлади. Мавсум аввалида «Ливерпуль»дан ижарага олинган Ҳарри Уилсон эса бўлим сўнгида Эдерсон дарвозасига жарима зарбасидан қойилмақом гол уришга эришди. Ўйинга якуний нуқтани қўйиш эса Серхио Агуэрога насиб қилди. Давид Сильванинг узатмасини аргентиналик ҳужумчи кўкка совурмади. Натижада «Манчестер Сити» ғалабани тантана қилди ва ўз ҳисобидаги очколар сонини 7 тага етказиб, мусобақа жадвалида 2-ўринга кўтарилиб олди.
«Тоттенҳэм»—«Ньюкасл»
Турнинг яна бир сенсацион натижаси Лондонда қайд этилди. Маурисио Почеттино қўл остидаги «Тоттенҳэм» 3-турга келиб, мавсумдаги илк мағлубиятини қабул қилишга мажбур бўлди. «Шпорлар» ўз майдонида «Ньюкасл»ни қабул қилиб, бразилиялик Жоэлинтоннинг 27-дақиқада киритган голи эвазига ютқазди. Шу куни тўпга эгалик қилиш бўйича рақибига мастер-класс кўрсатган мезбонларнинг гол уриш борасида омади келмади, холос.
Тур рақамларда
- 10 учрашувда жами 30 та гол урилди
- 12 та гол мезбонлар, 18 таси эса меҳмонлар ҳисобига ёзилди
- Энг сермаҳсул баҳс: «Норвич» — «Челси» 2:3
- Фақат 1 та ўйинда дуранг қайд этилди: «Вулверҳэмптон» — «Бёрнли» 1:1
- Фақатгина 9 та ўйиндан 2 тасида мезбонлар ғалаба қозонди
- 4 нафар футболчи дублга эришди: Тэмми Абраҳам, Муҳаммад Салоҳ, Серхио Агуэро, Себастиан Аллер
- Ортда қолган уч турдан сўнг очко йўқотмаган битта клуб қолди — «Ливерпуль»
Учрашувларда киритилган барча голларни @daryo_sport Telegram каналида томоша қилишингиз мумкин.
АПЛ
3-тур баҳслари
23 август, жума
«Астон Вилла»—«Эвертон» 2:0
Голлар: 1:0 — 21 Уэсли, 2:0 — 90 ал-Ғозий24 август, шанба
«Норвич»—«Челси» 2:3
Голлар: 0:1 — 3 Абраҳам, 1:1 — 6 Кэнтуэлл, 1:2 — 17 Маунт, 2:2 — 30 Пукки, 2:3 — 68 Абраҳам«Брайтон»—«Саутҳэмптон» 0:2
Голлар: 0:1 — 55 Женепо, 0:2 — 90 Редмонд«Манчестер Юнайтед»—«Кристал Пэлас» 1:2
Гол: 0:1 — 32 Айю, 1:1 — 89 Жеймс, 1:2 — 90 ван Анҳолт«Шеффилд Юнайтед»—«Лестер» 1:2
Голлар: 0:1 — 38 Варди, 1:1 — 62 Макберни, 1:2 — 70 Барнс«Уотфорд»—«Вест Ҳэм» 1:3
Голлар: 0:1 — 3, пенальти, Нобл, 1:1 — 17 Грэй, 1:2 — 64 Аллер, 1:3 — 73 Аллер«Ливерпуль»—«Арсенал» 3:1
Голлар: 1:0 — 41 Матип, 2:0 — 49, пенальти, Салоҳ, 3:0 — 58 Салоҳ, 3:1 — 85 Торрейра25 август, якшанба
«Борнмут»—«Манчестер Сити» 1:3
Голлар: 0:1 — 15 Агуэро, 0:2 — 43 Стерлинг, 1:2 — 45 Уилсон, 1:3 — 64 Агуэро«Вулверҳэмптон»—«Бёрнли» 1:1
Гол: 0:1 — 13 Барнс, 1:1 — 90, пенальти, Ҳименес«Тоттенҳэм»—«Ньюкасл» 0:1
Гол: 0:1 — 27 Жоэлинтон
Тўпурарлар рўйхати
- Раҳим Стерлинг («Манчестер Сити») — 5 та гол
- Теему Пукки («Норвич») — 5 та гол
- Серхио Агуэро («Манчестер Сити») — 4 та гол
- Эшли Барнс («Бёрнли») — 4 та гол
- Муҳаммад Салоҳ («Ливерпуль») — 3 та гол
Изоҳ (0)