23-avgust, juma kuni Chechenistonning Shali shahrida Yevropadagi eng katta masjid ochildi. Bu haqda “RIA Novosti” xabar qiladi.
Masjid “Musulmonlarning g‘ururi” deb nomlanadi. Uning binosi ichiga 30 ming kishi sig‘adi va uning hududida bir vaqtning o‘zida 70 mingga yaqin kishi ibodat qilishi mumkin. Bu butun Shali aholisidan ham ko‘proq. 2019-yil ma’lumotiga ko‘ra, shahar aholisi 54 ming kishiga yaqinroq.
Masjid asosiy gumbazining balandligi 43 metr, yon tomonlarida esa 63 metrli to‘rtta minora joylashgan. Masjid oq marmardan qurilgan bo‘lib, sof oltin bilan ishlov berilgan. Bino 2012-yildan beri qurib kelinmoqda. Masjidning ochilishi Chechenistonning amaldagi rahbari Ramzan Qodirovning otasi, respublika birinchi prezidenti Axmat Qodirov tavalludining 68 yilligiga bag‘ishlangan.
“Biz masjidni hammamizga sevimli va aziz bo‘lgan payg‘ambarimiz Muhammad s.a.v. nomi bilan ataymiz”,— dedi ochilish marosimida Ramzan Qodirov.
Avvalroq, agentlik xabarlariga ko‘ra, Shali aholisi masjidga Ramzan Qodirovning nomini berish taklifi bilan chiqqan.
Izoh (0)