23 август, жума куни Чеченистоннинг Шали шаҳрида Европадаги энг катта масжид очилди. Бу ҳақда «РИА Новости» хабар қилади.
Масжид «Мусулмонларнинг ғурури» деб номланади. Унинг биноси ичига 30 минг киши сиғади ва унинг ҳудудида бир вақтнинг ўзида 70 мингга яқин киши ибодат қилиши мумкин. Бу бутун Шали аҳолисидан ҳам кўпроқ. 2019 йил маълумотига кўра, шаҳар аҳолиси 54 минг кишига яқинроқ.
Масжид асосий гумбазининг баландлиги 43 метр, ён томонларида эса 63 метрли тўртта минора жойлашган. Масжид оқ мармардан қурилган бўлиб, соф олтин билан ишлов берилган. Бино 2012 йилдан бери қуриб келинмоқда. Масжиднинг очилиши Чеченистоннинг амалдаги раҳбари Рамзан Қодировнинг отаси, республика биринчи президенти Ахмат Қодиров таваллудининг 68 йиллигига бағишланган.
«Биз масжидни ҳаммамизга севимли ва азиз бўлган пайғамбаримиз Муҳаммад с.а.в. номи билан атаймиз»,— деди очилиш маросимида Рамзан Қодиров.
Аввалроқ, агентлик хабарларига кўра, Шали аҳолиси масжидга Рамзан Қодировнинг номини бериш таклифи билан чиққан.
Изоҳ (0)