O‘zbekiston Xotin-qizlar qo‘mitasining umummilliy “1146-ishonch telefon”iga qilingan murojaatlarga ko‘ra, har ikkinchi murojaat turmush o‘rtog‘i tomonidan jismoniy zo‘ravonlik holatiga tegishli. Bu haqda O‘zbekiston Oliy Majlisi Senatining XXI yalpi majlisida aytib o‘tdi, deya xabar bermoqda “Daryo” muxbiri Musulmonbek Ibrohimov.
Yalpi majlisda “Xotin-qizlarni tazyiqlar va zo‘ravonlikdan himoya qilish to‘g‘risida”gi qonuni loyihasi muhokama qilindi.
Ta’kidlanishicha, oila, ish yoki o‘qish joyida kimdir ayolning, u ayol jinsiga mansub bo‘lganligi uchun, qadr-qimmatini toptash uning ruhiy holatiga salbiy ta’sir qiladi va bu holat unda umidsizlik kayfiyatini tug‘diradi. Uning oqibatida esa ayol o‘z shaxsiy chegarasini yo‘qotib na o‘zi uchun, na qilayotgan ishi uchun, na farzandi va oilasi uchun mas’uliyatni zimmasiga oladi.
O‘zbekiston Xotin-qizlar qo‘mitasining umummilliy “1146-ishonch telefon”iga 2019-yil boshidan uch oygacha qilingan murojaatlar tahlil qilinganda, ma’lum bo‘ldiki, O‘zbekistonda ayollarga nisbatan eng ko‘p qo‘llaniladigan zo‘ravonlik turi bu — oiladagi zo‘ravonlik ekanligi ma’lum bo‘ldi. (Tahlil qilingan 430 ta murojaatdan 207 tasi, ya’ni har ikkinchi murojaat turmush o‘rtog‘i tomonidan jismoniy zo‘ravonlik holatiga tegishlidir).
Shaxsga nisbatan jismoniy zo‘ravonlik qilish jinoiy jazolanadigan qilmish bo‘lishiga qaramay, amaliyotda ayollarga nisbatan, ayniqsa, oilaviy-maishiy hayotda zo‘ravonlik hollariga ichki ishlar xodimlari va boshqa davlat organlari tomonidan ko‘rilishi lozim bo‘lgan ma’lum harakatlar majmui belgilanmaganligi sababli, oilaning ichki masalasi sifatida unga yetarlicha e’tibor berilmaydi.
Bu masalalarni to‘liq qamrab oladigan yagona qonun hamda qat’iy belgilangan choralar mavjud emasligi esa tazyiq va zo‘ravonlik holatida qolgan xotin-qizlarni turli fojialarga olib kelmoqda.
Bundan tashqari, tegishli idora va vazirliklar tomonidan tizimga solingan kompleks-statistika olib borilmayapti.
Mazkur qonun muammoning yechimini ta’minlashga asos bo‘lishi har bir tazyiq va zo‘ravonlikdan jabr ko‘rgan ayollarga majmuaviy yordam choralarini hamkorlikda amalga oshirishni ta’minlaydi. Natijada kelajak avlodning ruhiy, ma’naviy salomatligiga bevosita ta’sir etuvchi ayol qadr-qimmatini oshirish ta’minlanadi.
Senatorlar “Xotin-qizlarni tazyiqlar va zo‘ravonlikdan himoya qilish to‘g‘risida”gi qonuni loyihasini ma’qulladi.
Oldinroq, Senat “O‘zbekiston Respublikasining Xotin-qizlar va erkaklar uchun teng huquq hamda imkoniyatlar kafolatlari to‘g‘risida”gi qonunini ma’qullangani haqida xabar bergandi.
Izoh (0)