22-avgustning e’tiborga molik yangiliklari — “Daryo” dayjestida.
Joriy yilning 21-avgust kuni Andijon viloyati ko‘p tarmoqli tibbiyot markazida davolanayotgan bemor Ahmedova Inobatxonning o‘g‘li tomonidan mazkur tibbiyot muassasasining ortopediya va jarohatlar oqibatlari bo‘limi xodimlariga nisbatan tajovuz amalga oshirildi.
Tajovuz oqibatida jabrlangan Bobur Shavkatov, Abduvohid Mo‘minov, Madina Erkinova, Izzatoy Mamajonova shifoxonaga yotqizildi. Ularga infuzion, detoksikatsion, degidratatsion va simptomatik terapiya o‘tkazildi. Tibbiy ko‘riklar natijasida hozirda bu xodimlarning ham umumiy holati nisbatan qoniqarli, deb aniqlangan.
***
Avval xabar berganimizdek, O‘zbekiston banklari xorijiy valyutani naqd pulda sotishni boshladi.
Markaziy bank Pul-kredit siyosati departamenti direktori Behzod Hamroyevga ko‘ra, bir kun ichida aholi tomonidan 15 million dollardan ortiq valyuta xarid qilingan. Shundan 9,6 million dollari naqd ko‘rinishda amalga oshirilgan.
***
O‘zbekistondagi madaniyat va istirohat bog‘larida o‘rnatilgan attraksionlar holati va ularning bexatar ishlatilishi bo‘yicha tekshiruv olib borildi.
Ta’kidlanishicha, attraksionlarning 1 ming 292 tasida texnik pasporti mavjud emas. 1 ming 106 tasida attraksionlarni kunlik texnik ko‘rikdan o‘tkazish jurnali yo‘q. 928 attraksionda ishlatish va o‘rnatish bo‘yicha yo‘riqnomalar mavjud emas. Attraksionlarga biriktirilgan xodimlarning 1 ming 258 nafarida o‘qiganlik to‘g‘risidagi maxsus guvohnomalar yo‘q va ular texnikadan foydalanish tartib-qoidalarini mutlaqo bilmaydi.
695 attraksionda javobgar shaxs tayinlanmagan bo‘lsa, 931 tasida operator va javobgar shaxslarning lavozim yo‘riqnomalari ishlab chiqilmagan. 854 ta attraksionda birinchi tibbiy yordam ko‘rsatish imkoniyati mavjud emas.
***
IIV Samarqanddagi bosqinchilik haqida rasmiy ma’lumot berdi.
Joriy yilning 14-avgust kuni ijtimoiy tarmoqlarda “Navoiy viloyati Xatirchi tumanida qiz bolaga pichoq tiraganlar” nomi bilan tarqalgan video IIV huzuridagi tergov departamenti tomonidan o‘rganildi.
Voqea Navoiy viloyatining Xatirchi tumanida emas, balki Samarqand viloyatining Narpay tumanida 2019-yilning 10-iyun kuni sodir bo‘lgan.
Shu kuni soat 23:00 larda T.S., A.Q. va Q.A. o‘zaro oldindan jinoiy til biriktirib, Narpay tumanining Oqtosh shahri hududida U.K.ga tegishli bo‘lgan Tiko mashinasida G.R. bilan o‘zaro suhbatlashib o‘tirgan O.Q., U.K. va D.S.ning tanasini turli joylariga urib-tepib, ularning hayoti va sog‘lig‘i uchun xavfli bo‘lgan zo‘rlik ishlatgan.
So‘ng U.K.ga tegishli Samsung telefoni va mashinaning bir juft Sony rusumli radiokarnayi, D.S.ga tegishli Samsung telefon va 750 ming so‘m pul, O.Q.ga tegishli Samsung telefoni va erkaklar kumush zanjirini qo‘lga kiritgan.
***
Axborot va ommaviy kommunikatsiyalar agentligi direktor o‘rinbosari Saida Mirziyoyeva farzand tarbiyasini zahmatli, biroq juda zavqli va bir umrlik sayohatga o‘xshatishini bildirdi.
“Men bolalarim uchun birinchi navbatda ishonchli do‘st bo‘lishga harakat qilaman. Ularni qanday ko‘rishni istasam, o‘zim ham shunday, ularga namuna bo‘lishga intilaman! Orzum o‘g‘limni musiqaga oshno qilish edi, buni ro‘yobga chiqarish uchun 25 yillik tanaffusdan so‘ng yana fortepiano qarshisiga o‘tirishimga to‘g‘ri keldi”, — deya yozuv qoldirgan Saida Mirziyoyeva.
***
Forbes jurnalining versiyasiga ko‘ra, Gollivud aktyori Dueyn Jonson 2019-yilning eng ko‘p daromad ko‘rgan aktyoriga aylandi.
Dueyn Jonson joriy yilda 89,4 million dollar ishlab topgan.
“Qoya” laqabli aktyor o‘tgan yili ushbu reytingning ikkinchi pog‘onasidan joy olgan edi. Birinchilik yil davomida 239 million dollar ishlab topgan Jorj Kluniga nasib etgandi.
Forbes’ning yozishicha, “Jumanji: Yangi bosqich” filmining o‘zidan Jonson 23,5 million dollar gonorar olgan. Bundan tashqari aktyorga “Futbolchilar” serialida o‘ynagan har bir epizodi uchun 700 ming dollar to‘lanadi.
Izoh (0)