22 августнинг эътиборга молик янгиликлари — «Дарё» дайжестида.
Жорий йилнинг 21 август куни Андижон вилояти кўп тармоқли тиббиёт марказида даволанаётган бемор Аҳмедова Инобатхоннинг ўғли томонидан мазкур тиббиёт муассасасининг ортопедия ва жароҳатлар оқибатлари бўлими ходимларига нисбатан тажовуз амалга оширилди.
Тажовуз оқибатида жабрланган Бобур Шавкатов, Абдувоҳид Мўминов, Мадина Эркинова, Иззатой Мамажонова шифохонага ётқизилди. Уларга инфузион, детоксикацион, дегидратацион ва симптоматик терапия ўтказилди. Тиббий кўриклар натижасида ҳозирда бу ходимларнинг ҳам умумий ҳолати нисбатан қониқарли, деб аниқланган.
***
Аввал хабар берганимиздек, Ўзбекистон банклари хорижий валютани нақд пулда сотишни бошлади.
Марказий банк Пул-кредит сиёсати департаменти директори Беҳзод Ҳамроевга кўра, бир кун ичида аҳоли томонидан 15 миллион доллардан ортиқ валюта харид қилинган. Шундан 9,6 миллион доллари нақд кўринишда амалга оширилган.
***
Ўзбекистондаги маданият ва истироҳат боғларида ўрнатилган аттракционлар ҳолати ва уларнинг бехатар ишлатилиши бўйича текширув олиб борилди.
Таъкидланишича, аттракционларнинг 1 минг 292 тасида техник паспорти мавжуд эмас. 1 минг 106 тасида аттракционларни кунлик техник кўрикдан ўтказиш журнали йўқ. 928 аттракционда ишлатиш ва ўрнатиш бўйича йўриқномалар мавжуд эмас. Аттракционларга бириктирилган ходимларнинг 1 минг 258 нафарида ўқиганлик тўғрисидаги махсус гувоҳномалар йўқ ва улар техникадан фойдаланиш тартиб-қоидаларини мутлақо билмайди.
695 аттракционда жавобгар шахс тайинланмаган бўлса, 931 тасида оператор ва жавобгар шахсларнинг лавозим йўриқномалари ишлаб чиқилмаган. 854 та аттракционда биринчи тиббий ёрдам кўрсатиш имконияти мавжуд эмас.
***
ИИВ Самарқанддаги босқинчилик ҳақида расмий маълумот берди.
Жорий йилнинг 14 август куни ижтимоий тармоқларда «Навоий вилояти Хатирчи туманида қиз болага пичоқ тираганлар» номи билан тарқалган видео ИИВ ҳузуридаги тергов департаменти томонидан ўрганилди.
Воқеа Навоий вилоятининг Хатирчи туманида эмас, балки Самарқанд вилоятининг Нарпай туманида 2019 йилнинг 10 июнь куни содир бўлган.
Шу куни соат 23:00 ларда Т.С., А.Қ. ва Қ.А. ўзаро олдиндан жиноий тил бириктириб, Нарпай туманининг Оқтош шаҳри ҳудудида У.К.га тегишли бўлган Тико машинасида Г.Р. билан ўзаро суҳбатлашиб ўтирган О.Қ., У.К. ва Д.С.нинг танасини турли жойларига уриб-тепиб, уларнинг ҳаёти ва соғлиғи учун хавфли бўлган зўрлик ишлатган.
Сўнг У.К.га тегишли Samsung телефони ва машинанинг бир жуфт Sony русумли радиокарнайи, Д.С.га тегишли Samsung телефон ва 750 минг сўм пул, О.Қ.га тегишли Samsung телефони ва эркаклар кумуш занжирини қўлга киритган.
***
Ахборот ва оммавий коммуникациялар агентлиги директор ўринбосари Саида Мирзиёева фарзанд тарбиясини заҳматли, бироқ жуда завқли ва бир умрлик саёҳатга ўхшатишини билдирди.
«Мен болаларим учун биринчи навбатда ишончли дўст бўлишга ҳаракат қиламан. Уларни қандай кўришни истасам, ўзим ҳам шундай, уларга намуна бўлишга интиламан! Орзум ўғлимни мусиқага ошно қилиш эди, буни рўёбга чиқариш учун 25 йиллик танаффусдан сўнг яна фортепиано қаршисига ўтиришимга тўғри келди», — дея ёзув қолдирган Саида Мирзиёева.
***
Forbes журналининг версиясига кўра, Голливуд актёри Дуэйн Жонсон 2019 йилнинг энг кўп даромад кўрган актёрига айланди.
Дуэйн Жонсон жорий йилда 89,4 миллион доллар ишлаб топган.
«Қоя» лақабли актёр ўтган йили ушбу рейтингнинг иккинчи поғонасидан жой олган эди. Биринчилик йил давомида 239 миллион доллар ишлаб топган Жорж Клунига насиб этганди.
Forbes’нинг ёзишича, «Жуманжи: Янги босқич» фильмининг ўзидан Жонсон 23,5 миллион доллар гонорар олган. Бундан ташқари актёрга «Футболчилар» сериалида ўйнаган ҳар бир эпизоди учун 700 минг доллар тўланади.
Изоҳ (0)