Surxondaryolik uch yoshli qizaloqning operatsiyadan keyingi ahvoli ijtimoiy tarmoqlarda keng muhokama qilindi. Yuraklarni larzaga keltirgan ona nolasi va qizaloqning bugungi holati aks etgan videoni oxirigacha ko‘rishga bardoshi yetmaganlar ham ko‘p bo‘ldi.
Shahrizoda Mengqobilova 2016-yilda Qiziriq tumanida tug‘ilgan. Qizaloq tug‘ma yurak parogi bilan dunyoga kelgan, bunga qo‘shimcha ravishda bo‘ynida ham nuqsoni bo‘lgan. Shahrizodaning onasi Gulnoza Nurmanovaning aytishicha, vrachlar: “Qizingda yurak parogi bor, operatsiya bilan yaxshi bo‘ladi”, — degan.
— Operatsiyagacha qizim yaxshi rivojlandi, faqat ayrim vaqtlari barmoqlari ko‘karib qolar va tez charchab qolar edi, — deydi Gulnoza Nurmanova. — Uch yarim yoshda ko‘karish va tez charchashlari yo‘qolar deb operatsiya qildirishga qaror qildik. Vohidov nomidagi respublika jarrohlik markazi ham, Toshkent pediatriya tibbiyot instituti klinikasi shifokorlari ham operatsiya qilishga rozi bo‘lmadi. Operatsiyaga mablag‘imiz yo‘qligi tufayli “Sog‘lom avlod” fondiga murojaat qilgandik, ular ro‘yxatga qo‘ygan edi. “Sog‘lom avlod” fondi biz uchun Toshkent shahridagi “Era med” xususiy kilinikasiga 24 millionga yaqin pul o‘tkazib bergan ekan. Klinika vrachi Bobur Soliyev bir necha marta telefon qilib bizni chaqirdi. Biz 8-mayda “Era med”ga bordik, bir hafta mobaynida analiz oldi, tahlil javoblari yaxshi chiqdi va: “Qizing operatsiyaga yaraydi”, dedi.
Qizaloq 16-may kuni operatsiya qilingan, so‘ng bir hafta davomida reanimatsiyada yotgan.
— Bir haftadan keyin bolamni ko‘rganimda, u tanib bo‘lmas holatda edi. O‘shanda qizimning ahvoli juda og‘ir edi, hamma tarafi shishgan, peshob qilolmasdi. Buni vrachlarga aytganimda: “Buyragi “otkaz” qilyapti, yana reanimatsiyaga olamiz”, dedi. So‘ng qizimni narkozsiz to‘rtta joyidan teshib ko‘rishgan, kuchli og‘riqdan qizim nafas ololmay qolgan. Lor vrach kelib bo‘yniga trubka qo‘yguncha 3 soat nafas ololmay qiynalgan. Shundan keyin bolamning ko‘zlari ko‘r, oyoq-qo‘llari ishlamay qolgan, — deydi Gulnoza Nurmanova.
Shifokorlar bolaning bu og‘ir ahvolini vaqtinchalik, hali yaxshi bo‘lib ketadi deb ovutgan.
— Lekin yaxshi bo‘lmadi. Klinika vrachi: “Bolang qo‘rqdi, mulla olib kelib o‘qit”, dedi. Klinika reanimatsiyasida ikki oy yotdik, ahvoli tobora og‘irlashdi. Shundan so‘ng: “Endi bolangni nevropatologlar davolaydi”, deb bizni Surxondaryodagi viloyat ko‘p tarmoqli bolalar shifoxonasiga samolyot bilan o‘zlari qo‘yib ketishdi, — deydi Gulnoza Nurmanova.
Qizaloqning ahvoli kun sayin og‘irlashmoqda. Ona qayerga borishini, kimga murojaat qilishini bilmay halak.
— Balki chet elda davolash mumkindir, — deydi Gulnoza Nurmanova. — Har bir o‘tayotgan kun bolamni hayotdan uzoqlashtirayotganday... Qizimning orzulari ko‘p edi, operatsiyadan keyin qo‘llari ko‘karmay chiroyli bo‘lishini, kelin bo‘lishni orzu qilardi... Yaxshi odamlar ko‘pligiga ishonaman, klinika shifokorlari ham buni atay qilmaganini tushunaman. Faqat menga yordam beringlar, iltimos. Har qanday yordamga ehtiyojim baland hozir.
- Telefon raqami: +998-99 376-38-39 Nurmanova Gulnoza (Shahrizodaning onasi)
- Plastik-karta raqami: 8600 0602 2014 1338
Izoh (0)