O‘zbekiston Moliya vaziri energetika tizimida korrupsiya va ish tizimidagi kamchiliklar energiya resurslari tariflariga qay darajada ta’sir o‘tkazayotgani haqida izoh berdi. Bu haqda 1-avgust kuni energoresurslar narxining oshishiga bag‘ishlangan matbuot anjumanida aytib o‘tildi, deya xabar bermoqda “Daryo” muxbiri Musulmonbek Ibrohimov.
Anjumanda jurnalist shu paytgacha energetika tarmog‘ida yo‘qotilgan pullar — korrupsiya, noto‘g‘ri tizim 15-avgustdan boshlab energiya resurslari tariflariga yangi narxlar joriy etilishiga qay darjada ta’sir qildi, degan savol berdi. Bunga Moliya vaziri Jamshid Qo‘chqorov quyidagicha javob berdi:
“Menimcha, ta’siri bor bo‘lgan bo‘lishi kerak. Chunki elektr energiyanining 20 foizi yo‘qotilayotgan bo‘lsa, unga proporsional ravishda foyda yo‘qotilmoqda. Demak, buning narxini qoplashdagi zaxira, deb atasak bo‘ladi. Ya’ni agar shu yo‘qotish bo‘lmaganda, misol uchun, narxni kamroq oshirsa bo‘lar edi, deb aytilmoqda. Bu mantiqan 100 foiz to‘g‘ri. Lekin tabiiy yo‘qotishlar ham bor. Chunki elektr energiya simda yurganda yo‘qoladi. Tabiiy yo‘qotishlar dunyoda 6-5 foiz deyilmoqda, bizda esa 20 foiz. Hozirgi tariflar baribir ham investitsiya xarajatlarini qoplaydigan darajada emas. Bu sohada, birinchi korrupsiyani, ikkinchisi bemazagarchilikni ya’ni ishlashni bilmaslik yo‘qotilmas ekan chiqimlar odamlar hisobiga yopilgan bo‘ladi”, — dedi vazir.
Jurnalist tizimdagi kamchiliklar uchun xalq qiynalmoqdami, deya savolni davom ettirdi. Bunga Moliya vaziri “Ma’lum ma’noda shunday desa bo‘ladi”, —deya javob berdi.
Ma’lumot uchun, Vazirlar Mahkamasining 30-iyuldagi “Yoqilg‘i-energetika resurslarining narx va tariflarini o‘zgartirish to‘g‘risida”gi qaroriga ko‘ra 15-avgustdan O‘zbekistonda tabiiy va suyultirilgan gaz, shuningdek, elektr energiyasi uchun tariflar oshiriladi.
Qarorga binoan, hisoblagichlar mavjud bo‘lganda aholiga sotiladigan bir kubometr tabiiy gazning narxi 380 so‘mni tashkil etadi (hozirda — 320 so‘m, o‘sish — 18,7 foiz). Hisoblagich yo‘q bo‘lganda, pishirish va suvni isitish uchun ishlatilgan gazning narxi 660 so‘m bo‘ladi (hozirda — 553 so‘m, o‘sish — 19,3 foiz), isitish tizimi uchun esa — 380 so‘m (hozirda — 320 so‘m, +18,7 foiz).
Aholi uchun beriladigan suyultirilgan gazning kilogrammi 1120 so‘mni tashkil etadi. Hozirda uning narxi 950 so‘m bo‘lib, o‘sish 17,8 foizga teng.
Turar joy iste’molchilari uchun 1 kVt/soat elektr energiyasi 250 so‘mdan 295 so‘mga oshadi. Boshqa kategoriyadagi iste’molchilar uchun esa tarif qiymati 450 so‘mga teng.
Izoh (0)