Adliya vazirligi o‘z tizimida korrupsiyaga qarshi murosasiz kurash e’lon qilib, shu yil boshida “Korrupsiyaga qarshi kurashish” va “Ochiq adliya” dasturlarini joriy etdi.
O‘zAning yozishicha, ushbu ikki loyiha orqali korrupsiyaga qarshi kurashishda keng jamoatchilik yordamidan foydalanish nazarda tutilgan. Xususan, xodimlar mas’uliyati va javobgarligini oshirish maqsadida fuqarolarga adliya organlarida foto, video va audio qayd etishga ruxsat berildi.
Adliya organlari va muassasalaridagi korrupsiyaga oid huquqbuzarlik holatlari haqidagi xabarlarni darhol va o‘z vaqtida yetkazilishini ta’minlashga qo‘shimcha imkoniyat yaratish maqsadida telegram ijtimoiy tarmog‘ida “@antikorbot” nomli maxsus bot yaratilgan.
Ta’kidlanishicha, ushbu bot orqali shu kunga qadar 2 mingdan oshiq tezkor xabarlar kelib tushgan. Bu xabarlarga asosan o‘tkazilgan xizmat tekshiruvlari natijasiga ko‘ra tizimda ishlayotgan 18 nafar xodim lavozimidan ozod etilgan. Jumladan, notarius yordamchisi mijozdan ortiqcha pul mablag‘i olganligi uchun o‘sha notarial idoradagi barcha xodimlar bilan tuzilgan mehnat shartnomalari bekor qilingan.
Davlat notarial idorasi, notarial arxiv va davlat xizmatlari markazlari xodimlari faoliyatida mehnat intizomi, Adliya vazirligi xodimlarining odob-axloq qoidalariga rioya etilishi, shuningdek, ular zimmasiga yuklatilgan vazifalarning bajarilishi ustidan doimiy nazorat olib borish maqsadida 1 028 ta qisqa muddatli tekshirishlar (reyd tadbirlari) o‘tkazilib, 832 nafar mas’ul xodimga tegishli jazo choralari ko‘rilgan.
Shu bilan birga, 670 ta “sirli mijoz” tadbirlari o‘tkazilib, real xizmat oluvchi shaxs sifatida davlat xizmatlari jarayonida qatnashish orqali xizmat ko‘rsatishning sifati, muddati, shart-sharoiti o‘rganilib, 221 nafar mas’ul xodimga tegishli jazo choralari ko‘rilgan.
Izoh (0)