Адлия вазирлиги ўз тизимида коррупцияга қарши муросасиз кураш эълон қилиб, шу йил бошида «Коррупцияга қарши курашиш» ва «Очиқ адлия» дастурларини жорий этди.
ЎзАнинг ёзишича, ушбу икки лойиҳа орқали коррупцияга қарши курашишда кенг жамоатчилик ёрдамидан фойдаланиш назарда тутилган. Хусусан, ходимлар масъулияти ва жавобгарлигини ошириш мақсадида фуқароларга адлия органларида фото, видео ва аудио қайд этишга рухсат берилди.
Адлия органлари ва муассасаларидаги коррупцияга оид ҳуқуқбузарлик ҳолатлари ҳақидаги хабарларни дарҳол ва ўз вақтида етказилишини таъминлашга қўшимча имконият яратиш мақсадида телеграм ижтимоий тармоғида «@antikorbot» номли махсус бот яратилган.
Таъкидланишича, ушбу бот орқали шу кунга қадар 2 мингдан ошиқ тезкор хабарлар келиб тушган. Бу хабарларга асосан ўтказилган хизмат текширувлари натижасига кўра тизимда ишлаётган 18 нафар ходим лавозимидан озод этилган. Жумладан, нотариус ёрдамчиси мижоздан ортиқча пул маблағи олганлиги учун ўша нотариал идорадаги барча ходимлар билан тузилган меҳнат шартномалари бекор қилинган.
Давлат нотариал идораси, нотариал архив ва давлат хизматлари марказлари ходимлари фаолиятида меҳнат интизоми, Адлия вазирлиги ходимларининг одоб-ахлоқ қоидаларига риоя этилиши, шунингдек, улар зиммасига юклатилган вазифаларнинг бажарилиши устидан доимий назорат олиб бориш мақсадида 1 028 та қисқа муддатли текширишлар (рейд тадбирлари) ўтказилиб, 832 нафар масъул ходимга тегишли жазо чоралари кўрилган.
Шу билан бирга, 670 та «сирли мижоз» тадбирлари ўтказилиб, реал хизмат олувчи шахс сифатида давлат хизматлари жараёнида қатнашиш орқали хизмат кўрсатишнинг сифати, муддати, шарт-шароити ўрганилиб, 221 нафар масъул ходимга тегишли жазо чоралари кўрилган.
Изоҳ (0)