Toshkent viloyatining O‘rtachirchiq tumani “Paxtaobod” QFYdagi “Kuchlik” stansiyasi hududida 2018-yilda (sobiq paxta tozalash zavodi o‘rnida) xitoylik investorlar tomonidan Surxondaryo viloyati va Qoraqalpog‘istondan keltiriluvchi qizilmiya ildizlarini qayta ishlash bo‘yicha “Agro Pekin” qo‘shma korxonasi tashkil etilgan.
“Daryo”ning Sog‘liqni saqlash vazirligidagi manbasining xabar berishicha, ushbu qo‘shma korxona ish boshlaganidan so‘ng joriy yilning mart oyidan boshlab yuqoridagi aholi punktida hududga xos bo‘lmagan ilonlar, chivinlar va boshqa hasharotlarning paydo bo‘lgani aniqlangan.
Shu bilan birga, aholi orasida chivin chaqishi bilan bog‘liq uzoq davom etuvchi yarali va yiringli teri kasalliklari tarqalgani, uning o‘rnida chuqur chandiqlar qolishi holatlari qayd etilmoqda. Korxona bolalar bog‘chasi yaqinida joylashganini e’tiborga olgan holda, ushbu kasallik aksariyat hollarda bolalarda kuzatilmoqda.
Mahalliy aholining so‘zlariga ko‘ra, qizilmiya ildizini qayta ishlash natijasida hosil bo‘lgan kimyoiy moddalar belgilangan sanitariya talablarini buzgan holda yerga to‘kilmoqda. Oqibatda bu aholi iste’moli uchun tortib olinadigan ichimlik suvi tarkibiga salbiy ta’sir qilmoqda.
Mahalla vakillari bu masala yuzasidan bir necha marta korxona mutasaddilariga murojaat qilgan, ammo ular chora ko‘rmagan. Mahalliy hokimiyat esa shikoyatlarga e’tibor qaratmagan.
Yuzaga kelgan vaziyatni o‘rganish maqsadida Sog‘liqni saqlash vazirligi tomonidan tibbiy mutaxassislar va Respublika davlat sanitariya-epidemiologiya nazorati markazi xodimlaridan iborat ishchi guruh tuzilgan.
Izoh (0)