Yolg‘onchi, yolg‘onchi va yana yolg‘onchi. Jahon futbolining va’dasiga vafo qilmagan 5 futbolchisi haqida

Ko‘plab sohalarda bo‘lgani kabi futbolda ham shaxslar o‘z fikrlariga qarshi gapirib turadi. Jumladan, futbolchilar boshqa jamoaga o‘tmayman deya turib, oradan hech qancha vaqt o‘tmay boshqa klub ramzini o‘pgan holatda suratga tushadi. Quyida jahon futbolining yaqin o‘tmishdagi va’dasiga va’fo qilmagan 5 futbolchisi haqida gaplashamiz.

Gael Klishi

“Arsenal”dan to‘p surgan Gael Klishi vaqtida jamoadoshlari — Kolo Ture hamda Emmanuel Adebayorning “Manchester Siti”ga o‘tib ketganining guvohiga aylanib, ularni yaxshigina tanqid qiladi. U bunday futbolchilarni futbolni emas, balki pulni tanlab jamoadan ketganlikda ayblab chiqadi:

“Agar futbolchi faqat va faqat pul haqida o‘ylasa, u ertami, kechmi baribir “Manchester Siti”da paydo bo‘ladi. Tanlash lozim: yoki sen katta klubda o‘ynashda davom etib, o‘zingga bo‘lgan hurmatni saqlab qolasan, yoki shunchaki yaxshi klubda o‘ynab, mo‘maygina pul topasan. Axir kimgadir haftasiga 300 ming funt maosh taklif qilish, qandaydir ahmoqgarchilikdan o‘zga narsa emas”, — deydi Klishi.

Shu gaplarni aytganidan ikki yil o‘tib, qahramonimiz ham “Manchester Siti”ni tanlaydi. Va jamoa bilan Angliya chempionligini qo‘lga kiritadi.

Samyuel Eto’O

2005-yil Londonning “Chelsi” klubi Yevropa Chempionlar Ligasi pley-offida “Barselona” bilan to‘qnash keladi. Uchrashuvdan so‘ng kataloniyaliklar hujumchisi Samyuel Eto’O London klubi bosh murabbiyi Joze Mourinyo yoniga kelib, uning boshqaruvidagi jamoaga hech qachon o‘tmasligini ma’lum qiladi.

“Mourinyo qo‘l ostidagi jamoaga hech qachon o‘tmayman. U o‘zini tutishi bilan so‘nggi ikki o‘yinimizni rasvo qildi”, — degandi keyinroq Samyuel.

“Chelsi”ga qarshi o‘yin oldidan kamerunlik futbolchi Mourinyoning tez orada o‘z qishlog‘ida “yong‘oq” sotishini, va London klubini uzoq boshqara olmasligini ham ta’kidlagandi. Keyinchalik esa futbolchi portugaliyalikni, yaxshi inson va buyuk murabbiy sifatida tilga oladi.

Oradan bir muncha vaqt o‘tib, Eto’Oning lug‘at boyligida “hech qachon” so‘zi boshqa ma’no anglatishi ma’lum bo‘ladi: futbolchi 2009-yil “Inter”ga o‘tadi. Milan klubida esa Mourinyo bosh murabbiy etdi. Samyuel birinchi mavsumning o‘zida Mourinyo qo‘l ostida trebl qayd etishga muvaffaq bo‘ladi. 2013-yil Eto’Oni taqdir “Chelsi”ga yetaklaydi. Ne ajabki, London klubida yana Joze bosh murabbiy edi…

Samir Nasri

2011-yil Angliya Liga Kubogi finalida “Birminhem”ga qarshi o‘yin oldidan “Arsenal” yarim himoyachisi Samir Nasri muxlislarga qarata shunday deydi: Men “Arsenal”ga sovrinlar yutish uchun kelganman, shunday ekan sovrinsiz hech qayerga ketmayman”.

Buni qarangki, Yevropa Chempionlar Ligasida “Barselona”ga imkoniyatni boy bergan “Arsenal” ichki birinchilikka bor e’tiborini qaratib, oxirda hech narsasiz qoladi. Angliya Kubogi “Manchester Yunayted”ga, Liga Kubogi esa “Birminghem”ga boy berildi.

Yozgi transferlar oynasida esa Samir Nasri havorang libosni kiyib, “Manchester Siti” a’zosiga aylandi.

Arturo Vidal

Vidalning Turindagi hayoti juda yaxshi ketayotgandi. U “Yuventus”da dunyoning eng yaxshi yarim himoyachilaridan biriga aylandi. U Italiyada yutish mumkin bo‘lgan barcha narsa ega chiqdi, shuningdek, Yevropa Chempionlar Ligasi finalida o‘ynadi.

“Turinda meni hamma yaxshi ko‘radi. Bu yer menga ham ma’qul. Oilam esa o‘zini juda qulay his qilmoqda. Ayting-chi, men bu yerdan nima uchun ketishim kerak?!” — deydi Vidal ajoyib kunlarning birida.

Haqiqatdan ham nimaga? Unda nima uchun shu gaplarni aytganingdan 4 oy o‘tiboq “Bavariya”ga o‘tib ketding, Arturo?

Mats Hummels

Mario Gyotsening “Bavariya” yo‘l olganidan uning jamoadoshi Mats Hummels norozi bo‘lgandi: “Gyotsening qarorini tushunmadim. Bu haqda uning o‘ziga ham aytdim. Dortmunddagi hamma hayron qoldi. Axir hamma bizning qanday kuchli jamoaga aylanganimizni ko‘rib turgandi. “Borussiya”ni tark etish uchun sportga bog‘liq birorta sabab yo‘q edi”.

Oradan uch yil o‘tib esa, Matsning o‘zi ham Gyotse va Levandovskining ortidan “Bavariya”da paydo bo‘ldi. Ziyrak muxlislar esa bir vaqtlar Matsning o‘zi aytgan so‘zlarni unga ko‘p bora eslatib turdi. 2019-yil yoziga kelib esa “daydi o‘g‘il” yana “Borussiya Dortmund”dan qo‘nim topdi.