Ёлғончи, ёлғончи ва яна ёлғончи. Жаҳон футболининг ваъдасига вафо қилмаган 5 футболчиси ҳақида

Кўплаб соҳаларда бўлгани каби футболда ҳам шахслар ўз фикрларига қарши гапириб туради. Жумладан, футболчилар бошқа жамоага ўтмайман дея туриб, орадан ҳеч қанча вақт ўтмай бошқа клуб рамзини ўпган ҳолатда суратга тушади. Қуйида жаҳон футболининг яқин ўтмишдаги ваъдасига ваъфо қилмаган 5 футболчиси ҳақида гаплашамиз.

Гаэль Клиши

«Арсенал»дан тўп сурган Гаэль Клиши вақтида жамоадошлари — Коло Туре ҳамда Эммануэл Адебайорнинг «Манчестер Сити»га ўтиб кетганининг гувоҳига айланиб, уларни яхшигина танқид қилади. У бундай футболчиларни футболни эмас, балки пулни танлаб жамоадан кетганликда айблаб чиқади:

«Агар футболчи фақат ва фақат пул ҳақида ўйласа, у эртами, кечми барибир «Манчестер Сити»да пайдо бўлади. Танлаш лозим: ёки сен катта клубда ўйнашда давом этиб, ўзингга бўлган ҳурматни сақлаб қоласан, ёки шунчаки яхши клубда ўйнаб, мўмайгина пул топасан. Ахир кимгадир ҳафтасига 300 минг фунт маош таклиф қилиш, қандайдир аҳмоқгарчиликдан ўзга нарса эмас», — дейди Клиши.

Шу гапларни айтганидан икки йил ўтиб, қаҳрамонимиз ҳам «Манчестер Сити»ни танлайди. Ва жамоа билан Англия чемпионлигини қўлга киритади.

Самюуэль Это’O

2005 йил Лондоннинг «Челси» клуби Европа Чемпионлар Лигаси плей-оффида «Барселона» билан тўқнаш келади. Учрашувдан сўнг каталонияликлар ҳужумчиси Самюуэль Это’O Лондон клуби бош мураббийи Жозе Моуриньо ёнига келиб, унинг бошқарувидаги жамоага ҳеч қачон ўтмаслигини маълум қилади.

«Моуриньо қўл остидаги жамоага ҳеч қачон ўтмайман. У ўзини тутиши билан сўнгги икки ўйинимизни расво қилди», — деганди кейинроқ Самюуэль.

«Челси»га қарши ўйин олдидан камерунлик футболчи Моуриньонинг тез орада ўз қишлоғида «ёнғоқ» сотишини, ва Лондон клубини узоқ бошқара олмаслигини ҳам таъкидлаганди. Кейинчалик эса футболчи португалияликни, яхши инсон ва буюк мураббий сифатида тилга олади.

Орадан бир мунча вақт ўтиб, Это’Oнинг луғат бойлигида «ҳеч қачон» сўзи бошқа маъно англатиши маълум бўлади: футболчи 2009 йил «Интер»га ўтади. Милан клубида эса Моуриньо бош мураббий этди. Самюуэль биринчи мавсумнинг ўзида Моуриньо қўл остида требл қайд этишга муваффақ бўлади. 2013 йил Это’Oни тақдир «Челси»га етаклайди. Не ажабки, Лондон клубида яна Жозе бош мураббий эди…

Самир Насри

2011 йил Англия Лига Кубоги финалида «Бирминҳэм»га қарши ўйин олдидан «Арсенал» ярим ҳимоячиси Самир Насри мухлисларга қарата шундай дейди: Мен «Арсенал»га совринлар ютиш учун келганман, шундай экан совринсиз ҳеч қаерга кетмайман».

Буни қарангки, Европа Чемпионлар Лигасида «Барселона»га имкониятни бой берган «Арсенал» ички биринчиликка бор эътиборини қаратиб, охирда ҳеч нарсасиз қолади. Англия Кубоги «Манчестер Юнайтед»га, Лига Кубоги эса «Бирмингҳэм»га бой берилди.

Ёзги трансферлар ойнасида эса Самир Насри ҳаворанг либосни кийиб, «Манчестер Сити» аъзосига айланди.

Артуро Видаль

Видалнинг Туриндаги ҳаёти жуда яхши кетаётганди. У «Ювентус»да дунёнинг энг яхши ярим ҳимоячиларидан бирига айланди. У Италияда ютиш мумкин бўлган барча нарса эга чиқди, шунингдек, Европа Чемпионлар Лигаси финалида ўйнади.

«Туринда мени ҳамма яхши кўради. Бу ер менга ҳам маъқул. Оилам эса ўзини жуда қулай ҳис қилмоқда. Айтингчи, мен бу ердан нима учун кетишим керак?!» — дейди Видаль ажойиб кунларнинг бирида.

Ҳақиқатдан ҳам нимага? Унда нима учун шу гапларни айтганингдан 4 ой ўтибоқ «Бавария»га ўтиб кетдинг, Артуро?

Матс Ҳуммелс

Марио Гётценинг «Бавария» йўл олганидан унинг жамоадоши Матс Ҳуммелс норози бўлганди: «Гётценинг қарорини тушунмадим. Бу ҳақда унинг ўзига ҳам айтдим. Дортмунддаги ҳамма ҳайрон қолди. Ахир ҳамма бизнинг қандай кучли жамоага айланганимизни кўриб турганди. «Боруссия»ни тарк этиш учун спортга боғлиқ бирорта сабаб йўқ эди».

Орадан уч йил ўтиб эса, Матснинг ўзи ҳам Гётце ва Левандовскининг ортидан «Бавария»да пайдо бўлди. Зийрак мухлислар эса бир вақтлар Матснинг ўзи айтган сўзларни унга кўп бора эслатиб турди. 2019 йил ёзига келиб эса «дайди ўғил» яна «Боруссия Дортмунд»дан қўним топди.