Toshkent shahar IIBB fuqarolardan biri tomonidan videoga tushirilgan Damas rusumli avtomobil va YPX patrul avtomobili ishtirokidagi hodisa bo‘yicha izoh berdi.
Matbuot xizmatiga ko‘ra, videoga tushirilgan hodisa 28-iyul kuni soat 17:00 da Olmazor tumanida ro‘y bergan. Damas haydovchisi Sag‘bon ko‘chasida qarama-qarshi yo‘ldan harakatlanganida YPX inspektorining to‘xtash haqidagi ishorasiga bo‘ysinmagan.
Shundan so‘ng ichki ishlar organlari xodimi tegishli tartibda qoidabuzarni ta’qib qilishni boshlagan. Bevosita rahbarining ko‘rsatmasiga binoan, boshqa fuqarolar uchun xavf tug‘dirmaslik maqsadida, YPX inspektori mashinani ta’qib qilishni to‘xtatgan.
Ammo qoidabuzar haydovchi yo‘l harakati qoidalarini qo‘pol tarzda buzib, boshqa insonlarning hayotini xavf ostiga qo‘ygan holda Kichik xalqa avtomobil yo‘li va Sag‘bon ko‘chalari chorrahasida yashiringan.
Damas N.F. nomiga rasmiylashtirilganligi, boshqaruv uchun ishonchnoma esa to‘rt nafar fuqaroga berilganligi ma’lum bo‘ldi. Hozirgi vaqtda mashinani kim boshqarganligiga aniqlik kiritilmoqda.
Izoh (0)