Pensiya puli 100 foiz berilishi sharti bilan 30 ming pensioner ishga qayti. Bu haqda 25-iyul kuni Moliya vazirligi huzuridagi budjetdan tashqari Pensiya jamg‘armasi vakillari jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
2019-yilning 1-yanvaridan mehnat bilan band bo‘lgan pensionerlarga pensiya to‘lovlari 100 foiz to‘lanishi ma’lum qilingan edi. Shundan kelib chiqib, iqtisodiyotning boshqa sohalarida ham yaqin davr ichida 182 mingga yaqin yoshga doir pensiyadagi oliy va o‘rta maxsus ma’lumotli, boy tajribaga ega pedagog, tarbiyachi, shifokor va hamshira mehnat faoliyatiga qaytishi kutilayotgani aytilgandi.
Anjumanda Pensiya jamg‘armasining Mablag‘larni boshqarish va hisobini yuritish boshqarmasi boshlig‘i Nuriddin Shadixojayevning aytishicha, o‘tgan olti oy mobaynida ishchi pensionerlar soni ortgan.
“Ishlovchi pensionerlarga pensiya puli 50 foizgacha miqdorda beriladigan davrda O‘zbekistonda 100 ming nafar ishchi pensioner mavjud edi. 2019-yilning iyul holatiga solishtirib ko‘radigan bo‘lsak, ishlovchi pensionerlar soni 130 ming nafarga yetdi”, — dedi Shadixojayev.
Ma’lumot uchun, pensionerlarni ish beruvchi tashabbusi bilan ishdan ozod qilish, jumladan, maktab, maktabgacha tarbiya hamda tibbiy-profilaktika muassasalari, mulk shaklidan qat’i nazar iqtisodiyotning boshqa sohalari korxonalari, firmalari va tashkilotlarida Mehnat Kodeksining 100-moddasi, 2-qismi 7-bandidagi talablarga muvofiq pensiya yoshidagilarning sog‘lig‘i, mehnat qilish ishtiyoqi darajasini hisobga olib, ularni yengilroq ish bilan ta’minlashni kasaba uyushmasi roziligi bilan hal etish tavsiya qilinadi.
Barcha holatlarda ishlab turgan pensionerlarni asossiz ravishda rahbariyat tashabbusi bilan ishdan ozod qilgan ish beruvchilarga nisbatan minimal maosh miqdorining 10 karrasidan 100 karragacha jarimaga tortish borasida ogohlantirish berilmoqda.
Izoh (0)