O‘zbekistondagi Payme nazorat paketini sotib olganlar pul yuvishda ayblanmoqda

Gruziya bosh prokuraturasi mamlakatdagi eng yirik bank hisoblangan TBC Bank’ning ikki nafar asoschisi Mamuku Xazaradze va Badri Japaridzeni noqonuniy daromadlarni legallashtirishda ayblamoqda. Bu haqda Reuters’ga tayanib, “Xalq so‘zi Online” xabar berdi.

Xabarga ko‘ra, Mamuku Xazaradze va Badri Japaridze ustidan 16,75 million dollardan ortiq miqdordagi noqonuniy daromadlarni legallashtirishda ayblash bo‘yicha qaror kiritilgan. Bu bir guruh shaxslar tomonidan o‘ta yirik miqdorda foyda ko‘rish sifatida talqin etilmoqda.

Prokuratura TBC Bank’ning 2008-yildagi bank operatsiyalaridan birini o‘rganishi asnosida bu boradagi jinoyatni aynan TBC Bank Kuzatuv kengashi rahbari va uning o‘rinbosaridan gumon qilayotir.

Gruziya Milliy banki bosimi ostida ular o‘z lavozimlarini tark etishdi. Bu ularga o‘zlariga qarshi ayblovlardan himoyalanish uchun diqqatni jamlash imkonini ham berishi aytilgan.

Bank xabariga ko‘ra, endi Xazaradze va Japaridzening kompaniya kundalik boshqaruviga aloqasi yo‘q va TBC yoki uning bo‘limlariga qarshi hech qanday ayblov ilgari surilmaydi.

Xazaradze yaqinda fuqarolik harakatini tuzishni rejalashtirayotganini ma’lum qilgandi. Bu siyosiy partiyaga aylanishi mumkinligini ta’kidlagan tahlilchilar esa u va hamkasbiga qarshi ayblovlarni absurd deb atashgan.

“Bu bizga qarshi uyushtirilgan hujum, boz ustiga bu Gruziyadagi investitsiyaviy iqlimga zarar yetkazadi”, — dedi Xazaradze. U bank obro‘si va investorlar ishonchi yo‘qolganini qo‘shimcha qildi. Sababi bank aksiyalari ushbu yangiliklar ortidan 11 foizga tushib ketgan.

Japaridze o‘z navbatida TBC Bank biror loyihasini to‘xtatishni rejalashtirmayotgani va odatdagidek faoliyat yuritishini bildirgan.

Ma’lumot uchun, shu yil aprel oyida TBC Bank O‘zbekistondagi Payme nazorat paketini 5,5 million dollar evaziga sotib olgandi. May oyida kompaniya O‘zbekistonda nega ilk raqamli bank ochish niyatida ekanligini tushuntirgan edi.

Eslatib o‘tamiz, TBC Bank Gruziyadagi yetakchi moliya muassasasi bo‘lib, unga 1992-yilda asos solingan. 2014-yilda u London fond birjasiga kirdi. IPO doirasida 640 million dollarlik kapitallashuv bilan 240 million dollarni jalb etgan. TBC onlayn-banking xizmati Markaziy va Sharqiy Yevropada bir necha bor eng yaxshisi deb topilgan. 2018-yilda u Space nomli to‘liq raqamli bankni taqdim etgan.