Пенсия пули 100 фоиз берилиши шарти билан 30 минг пенсионер ишга қайти. Бу ҳақда 25 июль куни Молия вазирлиги ҳузуридаги бюджетдан ташқари Пенсия жамғармаси вакиллари журналистлар билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
2019 йилнинг 1 январидан меҳнат билан банд бўлган пенсионерларга пенсия тўловлари 100 фоиз тўланиши маълум қилинган эди. Шундан келиб чиқиб, иқтисодиётнинг бошқа соҳаларида ҳам яқин давр ичида 182 мингга яқин ёшга доир пенсиядаги олий ва ўрта махсус маълумотли, бой тажрибага эга педагог, тарбиячи, шифокор ва ҳамшира меҳнат фаолиятига қайтиши кутилаётгани айтилганди.
Анжуманда Пенсия жамғармасининг Маблағларни бошқариш ва ҳисобини юритиш бошқармаси бошлиғи Нуриддин Шадихожаевнинг айтишича, ўтган олти ой мобайнида ишчи пенсионерлар сони ортган.
«Ишловчи пенсионерларга пенсия пули 50 фоизгача миқдорда бериладиган даврда Ўзбекистонда 100 минг нафар ишчи пенсионер мавжуд эди. 2019 йилнинг июль ҳолатига солиштириб кўрадиган бўлсак, ишловчи пенсионерлар сони 130 минг нафарга етди», — деди Шадихожаев.
Маълумот учун, пенсионерларни иш берувчи ташаббуси билан ишдан озод қилиш, жумладан, мактаб, мактабгача тарбия ҳамда тиббий-профилактика муассасалари, мулк шаклидан қатъи назар иқтисодиётнинг бошқа соҳалари корхоналари, фирмалари ва ташкилотларида Меҳнат Кодексининг 100-моддаси, 2-қисми 7-бандидаги талабларга мувофиқ пенсия ёшидагиларнинг соғлиғи, меҳнат қилиш иштиёқи даражасини ҳисобга олиб, уларни енгилроқ иш билан таъминлашни касаба уюшмаси розилиги билан ҳал этиш тавсия қилинади.
Барча ҳолатларда ишлаб турган пенсионерларни асоссиз равишда раҳбарият ташаббуси билан ишдан озод қилган иш берувчиларга нисбатан минимал маош миқдорининг 10 каррасидан 100 каррагача жаримага тортиш борасида огоҳлантириш берилмоқда.
Изоҳ (0)