G‘allaorol tuman hokimligi 24-iyul kuni “Daryo” da e’lon qilingan “Jizzaxda ‘Obod qishloq’ dasturiga tushgan shaharchada gaz quvurlari talon-taroj qilindi” sarlavhali maqolaga munosabat bildirdi.
Aslida G‘allaorol tumanining Qo‘ytosh shaharchasida tabiiy gaz quvurlari, belgilangan tartibda demontaj qilinmoqda. Vazirlar Mahkamasining 2016-yil 19-apreldagi EDO-05/1-454-sonli hamda 2016-yil 7-apreldagi 06-06/1-444-sonli yig‘ilish bayonlarida berilgan topshiriqlarning ijrosini ta’minlash yuzasidan Jizzax viloyati va G‘allaorol tuman hokimlarining tegishli qarorlari qabul qilingan bo‘lib, Qo‘ytosh shaharchasi tumanning tabiiy gaz qiyin yetib boradigan hududlar toifasiga kiritilganligi munosabati bilan shaharcha aholisi tabiiy gaz tarmog‘idan uzilib, suyultirilgan gaz ta’minotiga o‘tkazilgan.
Bir necha yildan buyon shaharcha aholisi suyultirilgan gaz ballonlari bilan reja asosida imtiyozli narxlarda ta’minlanib kelinmoqda. Demontaj qilinishi rejalashtirilgan quvurlar tuman hokimligi qoshida tuzilgan ishchi guruh ishtirokida dalolatnoma asosida rasmiylashtirilib tuman gazta’minoti korxonasi hisobiga belgilangan tartibda kirim qilinmoqda. Mazkur quvurlar ayni paytda “Qo‘ytosh koni” omborxonasida saqlanayapti.
“Ta’kidlash kerakki, Qo‘ytosh shaharchasiga tabiiy gaz yetkazib berish to‘xtatilishi munosabati bilan hududdagi ijtimoiy soha muassasalarining mavjud isitish qozonlarini ko‘mir va boshqa muqobil yoqilg‘iga moslashtirish tadbirlari amalga oshirilgan. Hozirgi kunda ular kuz-qish mavsumida tayyorlanib, muassasalar ehtiyojiga yarasha ishlatilib kelinmoqda”, — deyiladi xabarda.
Izoh (0)