Markaziy harbiy okrugi tasarrufidagi Navoiy garnizonida Safarbarlik chaqiruvi rezervi batalyoni xizmatchilari uchun yangi harbiy qism qurilmoqda. Bu haqda Markaziy harbiy okrug matbuot xizmati ma’lum qildi.
Navoiy viloyati harbiy ma’muriy sektor bilan hamkorlikda 11 ta harbiy va ijtimoiy obyektlarda qayta ta’mirlanish ishlari amalga oshirilyapti. 5 ta bino esa yangidan qad rostlamoqda. Bundan tashqari, namunali saf maydoni, madaniyat markazi, sport shaharchasi, saylgoh hamda harbiy qism atrofida devor barpo etilmoqda.
Shuningdek, jangovar texnikalar harakatlanishi uchun 20 santimetr qalinlikdagi beton yo‘llar qurilyapti.
“Zarafshon golden group” kompaniyasining 200 nafardan ziyod ishchi va xizmatchilari, master va ish yurituvchilar hamda 20 ga yaqin maxsus texnikalar tomonidan qurilish ishlari jadallik bilan olib borilmoqda.
May oyida boshlangan bunyodkorlik ishlariga 6 milliard so‘m mablag‘ sarflangan.
Kattaqo‘rg‘on shahridagi harbiy qismda SChR batalyonida xizmatni o‘tayotgan navoiylik yoshlar uchun bugun aynan o‘zlari istiqomat qilayotgan shahar markazidagi Tinchlik mavzesida 27 o‘quv kun davomida harbiy tayyorgarlikdan o‘tishadi.
Hozirda askarlar yotoqxonasi, o‘quv binosi hamda boshqaruv shtabida qurilish ishlari yakunlangani bois, SChR batalyoni Kattaqo‘rg‘on shahridagi harbiy qismdan Navoiy viloyatiga ko‘chirilgan.
Ma’lumot o‘rnida, bir oylik safarbarlik chaqiruvi rezervi xizmatining to‘lov narxlari O‘zbekiston Respublikasi Prezidentining “Ish haqi, pensiyalar, stipendiyalar va nafaqalar miqdorini oshirish to‘g‘risida” gi farmoniga binoan eng kam ish haqining 20 barobari qilib belgilangan.
Izoh (0)