Аввал хабар берганимиздек, 20 июль куни тахминан соат 21:50да Бухоро вилояти, Шофиркон туманининг чўл ҳудудидан ўтувчи Зирабулоқ магистрал газқувур линияси («Газли—Чимкент» йўналишидаги) юқори босимли газ қувурининг 76-километрида ёрилиш содир бўлган.
ФВВ матбуот хизматига кўра, газ қувурида содир бўлган фавқулодда ҳолат пайтида қувурда газ босими 33-34 атмосферани ташкил қилиб, ушбу ҳолат газ қувурининг пайванд чоки очилиб кетиши оқибатида юзага келган. Натижада зарарланган қувурдан газ сизиб чиқиши ҳамда кейинчалик ишқаланишидан алангаланиш содир бўлган.
Газ сизиб чиқишини тўхтатиш мақсадида газ қувурининг 73 ва 100-километрларида газ тармоғи ўчирилган. Содир бўлган фавқулодда вазият жойи энг яқин аҳоли пунктидан тахминан 45-50 километр узоқликда жойлашган бўлиб, жабрланганлар ва ҳалок бўлганлар йўқ.
Юзага келган фавқулодда вазиятни бартараф этиш ишларига «Ўзтрансгаз» АЖ авария-тиклаш гуруҳларининг 15 нафар шахсий таркиби ва 12 та махсус техника жалб этилиб, ҳозирда ёрилган газ қувурида таъмирлаш-тиклаш ишлари олиб борилмоқда.
Шунингдек, воқеа жойига вилоят Фавқулодда вазиятлар бошқармаси, ФВБ ЁХБ ва Миллий гвардия раҳбарлари етиб борган.
Изоҳ (0)