2019-yilning birinchi yarim yilligida tashqi bozorga jami 780 ming tonna meva-sabzavot mahsulotlari (700 million dollardan ortiq) va 10 ming 268 tonna quritilgan mevalar eksport qilingan. Bu haqda O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida o‘tkazilgan ochiq muloqotda Qishloq xo‘jaligi vazirligi mutasaddilari tomonidan berilgan ma’lumotlarga tayangan holda O‘zA xabar qiladi.
Unda Prezidentning 2019-yil 20-martdagi “O‘zbekiston Respublikasida bog‘dorchilik va issiqxona xo‘jaligini yanada rivojlantirish chora-tadbirlari to‘g‘risida”gi qarorining mazmun-mohiyati va ijrosi muhokama qilindi.
O‘zbekistonda jami 269,5 ming gektar bog‘ bo‘lib, shundan 188 ming gektar bog‘ fermer xo‘jaliklari ixtiyorida. 2018-yilda esa 9 ming gektar intensiv bog‘lar barpo etilgan. Bog‘dorchilik sohasini texnikalar bilan to‘liq ta’minlash maqsadida 2025-yilgacha agrotexnikalar sonini 12 ming 533 donaga ko‘paytirish yuzasidan chora-tadbirlar ishlab chiqilgan va bu jarayon bosqichma-bosqich amalga oshirilmoqda.
Mutaxassislarning fikricha, ushbu talabni o‘rganish va qoplash borasida mamlakat agrar sohasida bir qator ishlar amalga oshirilmoqda. Tahlillar shuni ko‘rsatmoqdaki, bundan buyon urug‘ mevali bog‘lar emas, balki danak mevali bog‘larni ko‘paytirishga alohida e’tibor qaratish lozimligi ko‘rinmoqda.
Mamlakatdagi barcha toifadagi xo‘jaliklarda jami 269,5 ming gektar bog‘larning 118 ming gektari yoki 44 foizini olma bog‘lari tashkil etadi. Bugungi kunda dunyo bozorida asosiy talab gilos, shaftoli, o‘rik, olxo‘ri, xurmo va limon kabi bog‘dorchilik mahsulotlariga bo‘lmoqda. 2019-yil 1-iyul holatiga ko‘ra, 17 ming tonna gilos, 8,3 ming tonna shaftoli, 50 ming tonna o‘rik, 15 ming tonna olxo‘ri eksport qilindi. Limonga ham yil sayin talab ortib bormoqda.
Oxirgi 3 yilda respublika bog‘dorchilik sohasiga 750 million AQSh dollari miqdorida investitsiyalar jalb etildi. O‘zbekiston qishloq xo‘jaligi sohasida meva-sabzavotchilik sohasini rivojlantirish maqsadida Qoraqalpog‘iston Respublikasi va viloyatlarda joriy yilning shu davrigacha 56 ta meva-sabzavot klasteri tashkil etilib, ularga 23,7 ming gektar yer maydonlari ajratib berildi.
2016—2019-yillarda jami 293 ming gektar past hosilli paxta va g‘alla maydonlari qisqartirilib, ularning o‘rniga qo‘shimcha eksportbop ekinlar, jumladan, 93,7 ming gektar sabzavot, 37,5 ming gektar dukkakli, 15,1 ming gektar poliz, 55,6 ming gektar oziqa, 3 ming gektar sholi va 19,1 ming gektar moyli ekinlar ekiladi. 27,5 ming gektar intensiv bog‘lar va 11 ming gektar tokzorlar, 568 gektar maydonda issiqxonalar tashkil etilgan.
Anor va limon mahsulotlarini ko‘paytirish eksport hajmlarini oshirish, qolaversa, anor va limon brendlarini yaratish uchun “Limon yetishtiruvchilar va eksport qiluvchilar“ va “Anor yetishtiruvchilar“ uyushmalari tashkil etildi. Jahon bozorida anorga va limonga talab oshib borayapti. Joriy yilning o‘zida 2 ming gektardan ortiq maydonda anorzorlar tashkil etildi. Bundan tashqari, issiqxonalarda mandarin va apelsin o‘simliklarini ko‘paytirishga alohida e’tibor qaratilayapti.
Bugungi kunda mamlakatda bog‘larda ishlaydigan maxsus texnikalar bilan ta’minlanish darajasi 25-30 foizdir. Bog‘larda ixtisoslashgan mini traktorlar soni 1 ming 709 donani tashkil etadi. Bundan tashqari, bog‘larda agrotexnik tadbirlarni o‘z vaqtida o‘tkazish uchun zarur bo‘lgan turli xildagi agregatlar (purkagichlar, tirkamalar va boshqalar) soni 5 ming 270 donani tashkil etmoqda.
Izoh (0)