O‘zbekiston qamoqxonalari uchun mo‘ljallangan yagona gazetaning tiraji yildan-yilga qisqarmoqda. Bunga sabab — mahkumlar soni kamayayotgani

O‘zbekiston qamoqxonalaridagi mahkumlar IIV Jazoni ijro etish bosh boshqarmasining nashri hisoblangan “Vaqt—Vremya” gazetasiga obuna bo‘lish uchun hech qachon majburlanmagan. Bu haqda gazeta bosh muharriri Abduhoshim Ziyovudinov ma’lum qildi, deya xabar bermoqda “Daryo” muxbiri Musulmonbek Ibrohimov.

Ta’kidlanishicha, gazeta haftada bir marotaba, 12 sahifada, 8 ming nusxada chop etiladi. Gazetaning asosiy maqsadi — jazo muddatini o‘tayotgan shaxslarni jamiyatda sodir bo‘layotgan voqea-hodisalardan voqif etish, ularning huquqiy ongi va madaniyatini oshirish.

Gazeta adadi avvalgi yillarda 8 ming nusxadan ko‘p edi. Jazoni ijro etish muassasalarida mahkumlar soni kamaygani sari gazeta adadi ham qisqarib bormoqda. Bu tahririyat uchun yo‘qotish emas. Chunki muassis bizga moddiy ko‘mak berib turadi.

Mahkumlarning bari foydali mehnat bilan band qilingan. Ularga bajarayotgan ishiga qarab maosh to‘lanadi. Ular ishlab topgan pulidan gazetaga obuna bo‘lishi mumkin. Bu ixtiyoriy. Mahkumlar hech qachon gazetaga obuna bo‘lish uchun majburlanmagan. Shu bilan birga, jazoni ijro etish muassasasi xodimlari ham gazetaga obuna bo‘ladi.

Chop etish harajatlarining asosiy qismi muassis tomonidan qoplangani uchun “Vaqt—Vremya” gazetasi respublika bo‘yicha tannarxi eng past nashr hisoblanadi. Bosmaxona va yetkazib berish xarajatlari obunadan kelib tushgan mablag‘ hisobidan to‘lansa, tahririyatdagilarning ish haqi va boshqa xarajatlar muassis tomonidan qoplab beriladi.

Abduhoshim Ziyovudinov, “Vaqt—Vremya” gazetasi bosh muharriri